Zgjedhjet në Kosovë, Andoni: LDK do të ketë bjerrje, numrat që proklamon Kurti, të pa arritshëm

Nga OraNews Përditësimi i fundit 15 Janar 2021, 20:17

Kosova ndodhet para zgjedhjeve të radhës parlamentare. Analisti Ben Andoni thotë se në mjedisin politik nuk ka riciklim të madh.

Andoni: Kurti quhet i ri por nuk është i ri në politikë. Sfida e Kurtit është për të treguar sa ka mësuar nga qeverisja e pakët që i bëri Kosovës ndërsa Osmani për të treguar sa do të ketë fuqi shtetare. Osmani deri tani më shumë është treguar politikane e zonja sesa shtetare e mirë. Ndërsa Kurti ka premisa shumë të mëdha  pas atij zhgënjimi shumë të madh në Kosovë. Gjithësesi numrat që ai proklamon me njerëzit e tij janë të paarritshëm.

I pyetur nëse ky moment shënon mbylljen e ciklit të partive tradicionale, ai shprehet:

Andoni: Jo. Kosova ende është e ndarë me pjesën krahinore, klanore. Është shumë e vështirë për ti ndryshuar.

I ftuar në Rtv Ora, Andoni parashikon një tkurrje të madhe të LDK në këto zgjedhje dhe kjo jo vetëm për shkak të largimit të zonjës Osmani.

Andoni: Besoj që do të ketë bjerrje por jo thjesht prej kalimit të Vjosa Osmanit. Përveç faktit që zoti Hoti drejtoi teknikisht mirë, LDK e kanë goditur shumë në muajt pas zgjedhjeve përçarjet e brendshme. Realisht LDK do ta shikojmë në momentet kur Isa Mustafa nuk do të jetë më pjesë e kësaj partie. Ka përfunduar cikli i tij, përveç pjesës së traditës dhe zotësisë së makinacioneve që ai drejtuar si pak kush në Kosovë nuk ka asnjë vlerë tjetër.

Ndërsa të gjithë presin fitoren e Kurtit, Andoni thotë se të gjithë personazhet e para të partive janë konsumuar dhe në njëfarë mënyre duan të tërheqin në qerthullin e tyre.

Andoni: Të gjithë janë konsumuar personazhet e para të partive dhe në njëfarë mënyre duan të tërheqin në qerthullin e tyre edhe zotin Kurti. Kurti ua dha një sinjal me zgjedhjet e shkuara. Mënyra si e radikalizoi qeverisjen, mënyra e qëndrimit të tij e veçoi Kosovën.

Por ndërsa fituesi i zgjedhjeve është paraparë, sfida më e madhe mbetet zgjedhja e Presidentit.

Andoni: Këtë here Presidenti do të jetë i vështirë dhe nuk e përjashtoj zgjidhjen e bërë si në rastin e  zonjës Atifete  Jahjaga. Nuk besoj se do të jetë personazh politik.

Intervista me gazetarin Xhoi Malësia, përgatiti  Besjana Kuçana