Skandali me gjyqtaren e Apelit, nuk paraqitet në punë prej tre vitesh, ILD nis hetimin
Nga OraNews Përditësimi i fundit 10 Janar 2021, 16:35
Inspektori i Lartë i Drejtësisë ka nisur hetimin për rastin e një gjyqtareje në Gjykatën e Apelit të Tiranës, e cila ka tre vjet që nuk paraqitet në punë ndonëse figuron aktualisht si gjyqtare në këtë gjykatë.
Bëhet fjalë për gjyqtaren Evjeni Sinoymeri, e cila në nisje të procesit të vettingut i është drejtuar ish-këshillit të Lartë të Drejtësisë dy vite me parë me një kërkesë ku kërkonte për arsye familjarë një leje dy vjeçare.
Leja i është miratuar nga KLD e asaj kohe dhe ajo përfundonte në prill të vitit 2020.
Por Sinoymeri i është drejtuar sërish me një kërkesë Këshillit të Lartë Gjyqësor ku i kërkonte sërish leje, por këtë herë kërkesa nuk është miratuar.
Po pavarësisht refuzimit nga ana e KLGJ-së, gjyqtarja nuk është kthyer në detyrë ndërsa mesohet se ajo vijon të qëndrojë në Shtetet e Bashkuara të Amerikës së bashku me familjen e saj.
Rasti është denoncuar te Inspektori i Lartë i Drejtësisë, i cili ka nisur verifikimet dhe pritet t'i drejtohet me nje kërkesë për masë Këshillit të Lartë Gjyqësor.
Po kështu edhe KPK ka nxjerrë në kalendar seancën degjimore për Sinoymerin, e cila nuk dihet nëse do të paraqitet para Komisionit apo do të vijojë të qëndrojë ne SHBA.
Aktualisht Gjykata e Apelit ne Tiranë është në prag kolapsi për shkak të shkarkimeve të shumta të gjyqtarëve nga vettingu ndërsa numri i dosjeve është tepër i lartë.
