Ngritja e Gjykatës Kushtetuese, Braho: Ka një sërë shkeljesh ligjore që mund të shkaktojnë probleme në vendimmarrje

Nga OraNews Përditësimi i fundit 27 Dhjetor 2020, 21:18

Gjykata Kushtetuese, pas emërimit të dy anëtarëve të rinj të saj, Altin Binaj dhe Përparim Kalo, konsiderohet funksionale për të nisur procesin e vlerësimit të dosjeve në kompetencë.

I ftuar në  një intervistë për RTV Ora juristi, Ledio Braho, tha se ka një sërë shkeljesh ligjore që mund të shkaktojnë probleme në vendimmarrjet e Gjykatës Kushtetuese në të ardhmen.

Ledio Braho për RTV Ora:  Ka një sërë shkeljesh ligjore në emërimin e dy gjyqtarëve të fundit dhe ka të bëjë me faktin që si Parlamenti ashtu dhe Presidenti nuk i emëruan gjyqtarët nga lista me 3 anëtarë por në rastin e Kuvendit ishte vetëm një anëtar ndërkohë që në rastin e Presidentit ishte  lista dy nga të cilat Presidenti zgjodhi 1. Ligji për Gjykatën Kushtetuese është i qartë në dispozitat e tij që duhet të ketë të paktën 3 kandidatë. KED duhet të kualifikonte dhe të rendiste së paku 3 kandidatë.  Kjo mund të shndërrohet në një problem për të ardhmen. Sepse Gjykata Europiane e të Drejtave të Njeriut ka marrë një vendim që gjykon si gjykatë të paformuar me ligj rastin kur gjyqtarët zgjidhen në kundërshtim me ligjin.

Ai tregoi rastet kur Gjykata Europiane e të Drejtave të Njeriut mund të shpallë Gjykatën Kushtetuese si shkelëse të procesit ligjor.

Ledio Braho për RTV Ora:  Dhe është një rast që ka të bëjë me gjykatën e apelit në Islandë  kur një gjyqtar është zgjedhur në kundërshtim me ligjin që parashikonte në atë kohë. Dhe kjo nga GJEDNJ është konsideruar si shkelje e procesit ligjor. Kështu që e njëjta problematikë mund të ndodhë dhe në rastin e emërimeve të dy gjyqtarëve të fundit të Gjykatës Kushtetuese. Sepse nëse njëra nga palët që nuk do jetë e kënaqur me vendimin e GJK do ti drejtohet GJEDNJ  mund të ngrejë dhe problemin e gjykatës së pa krijuar me ligj dhe shkelës së parimit të procesit ligjor. Dhe më tej mund te jetë një shteg i hapur për të sjellë problematika në të ardhmen. Sepse nëse GJK konsiderohet e tillë kjo do sjellë probleme për të gjitha vendimmarrjet që do të marrë kjo Gjykatë për sa kohë është me 6 apo 7 anëtar në momentin që pjesë e trupës gjykuese do jenë këta gjyqtarë.

Intervistoi Besmira Pelushaj, përgatiti për online E.P