Nagar-Karabak, Armenia akuzon Azerbajxhanin për shkeljen e armëpushimit të ri

Nga OraNews Përditësimi i fundit 18 Tetor 2020, 08:07

Armenia akuzoi Azerbajxhanin për shkeljen e një armëpushimi të ri humanitar në rajonin e Nago-Karabakut vetëm disa minuta pasi hyri në fuqi.

Zëdhënësi i Ministrisë së Mbrojtjes së Jerevanit, Shushan Stepanyan, tha në Twitter se Azerbajxhani kishte qëlluar me predha artilerie dhe raketa në orët e para të së dielës, vetëm disa minuta pas fillimit të armëpushimit që kishte për qëllim ndaljen e luftimeve javore që ka marrë qindra jetë njerëzish.

Nga Azerbajxhani nuk pati asnjë reagim. Armëpushimi nisi në mesnatë me kohën lokale, një javë pasi një armëpushim i ndërmjetësuar nga Rusia u shkel menjëherë pasi hyri në fuqi.

Të shtunën, Azerbajxhani akuzoi Armeninë për goditjen e Ganjas, qyteti i saj i dytë më i madh, me një raketë balistike që vrau të paktën 13 civilë dhe plagosi 50 të tjerë.

Marrëveshja e re ishte njoftuar nga ministrat e jashtëm armene dhe azerbajxhanas pas telefonatave midis ministrit të Jashtëm rus Sergej Lavrov dhe homologëve të tij. Lavrov nxiti me forcë vendet që të respektojnë marrëveshjen e Moskës.

Karabaku ndodhet brenda Azerbajxhanit por ka qenë nën kontrollin e forcave etnike armene të mbështetura nga Armenia që kur mbaroi lufta në 1994.

Luftimet e fundit që filluan më 27 shtator përfshinë artileri të rëndë, raketa dhe dronë, duke vrarë qindra njerëz në konfliktin më të madh të regjistruar midis fqinjëve të Kaukazit të Jugut në më shumë se një çerek shekulli.

Emmanuel Macron, presidenti francez, e mirëpriti marrëveshjen dhe theksoi se ajo duhet të respektohet në mënyrë rigoroze nga të dy palët.

Ministria armene e Mbrojtjes mohoi fillimin e sulmit në Ganja, por autoritetet separatiste në Nago-Karabak nxorën një deklaratë ku renditeshin objektet ushtarake të pretenduara "legjitime" në qytet, megjithëse ata ndaluan së pretenduari përgjegjësinë për sulmin.

Zyrtarët azerbajxhanas thanë se raketa Scud, prodhim i ish-Bashkimit Sovjetik,  shkatërroi ose dëmtoi rreth 20 ndërtesa banimi në Ganja brenda natës dhe punëtorët e urgjencës kaluan orë të tëra duke kërkuar në rrënoja për viktimat dhe të mbijetuarit.

Raketat Scud datojnë që nga vitet 1960 dhe mbajnë një ngarkesë të madhe eksplozivi, por janë të njohura për mungesën e saktësisë.

Në një fjalim televiziv drejtuar kombit, presidenti i Azerbajxhanit, Ilham Aliyev, denoncoi sulmin me raketa si një krim lufte dhe paralajmëroi udhëheqjen e Armenisë se do të përballej me pasoja për sulmin.

Ndërsa autoritetet si në Azerbajxhan ashtu edhe në Armeni kanë mohuar se objektivi i tyre janë civilët, zonat e banuara janë sulmuar gjithmonë e më shumë përgjatë konfliktit të armatosur 3 javor.

Autoritetet azerbajxhanase thanë të shtunën se 60 civilë janë vrarë dhe 270 janë plagosur që nga 27 shtatori, por ata nuk kanë zbuluar humbje ushtarake. Autoritetet separatiste thanë se mbi 600 ushtarë të Nago-Karabakut dhe mbi 30 civilë janë vrarë në tre javë luftimesh.

Azerbajxhani këmbëngul se ka të drejtë të rimarrë tokën e tij me forcë pasi përpjekjet e të ashtuquajturit grup i ndërmjetësuesve ndërkombëtarë, Minsk, që përfshin Rusinë, Shtetet e Bashkuara dhe Francën, dështuan të japin ndonjë zgjidhje pas gati tre dekadash.

 Azerbajxhani insiston që aleati i tij Turqia të marrë një rol të rëndësishëm në bisedimet e ardhshme të paqes.