Të dehur në timon, tre të arrestuar në Durrës. Ndalohet edhe një person në kërkim
Nga OraNews Përditësimi i fundit 2 Tetor 2020, 09:04
Policia e Durrësit ka vënë në pranga 3 drejtues mjetesh, ndërsa ka ndaluar edhe një person të shpallur në kërkim.
Sipas policisë, të arrestuarit janë konstatuar duke drejtuar mjetin në gjendje të dehur.
Njoftimi i Policisë Durrës:
Arrestohen në flagrancë 3 drejtues mjetesh, ndalohet 1 tjetër i shpallur në kërkim.
Specialistët e Qarkullimit Rrugor në Drejtorinë Vendore të Policisë Durrës, në vijim të kontrolleve për parandalimin e aksidenteve rrugore dhe ndëshkimin e atyre drejtuesve që drejtojnë mjetin në gjendje të dehur, arrestuan në flagrancë shtetasit:
I. B., 54 vjeç, banues në Durrës, pasi u konstatua nga shërbimet e Policisë, në lagjen nr. 13, Durrës, duke drejtuar mjetin tip "Alfa Romeo", në gjendje të dehur, në masën 0.86 mg/l.
V. S., 43 vjeç, banues në Durrës, pasi në lagjen nr. 2, Durrës, duke drejtuar mjetin tip "Benz", në gjendje të dehur, në masën 0.92 mg/l, është përplasur me shtyllën e ndriçimit rrugor.
E. M., 29 vjeç, banues në Durrës, pasi u konstatua nga shërbimet e Policisë, në lagjen nr. 17, Durrës, duke drejtuar motoçikletën pa leje drejtimi.
U ndalua shtetasi i shpallur në kërkim F. K., 45 vjeç, banues në fshatin Bisht Kamzë, Durrës, pasi më datë 17.09.2020, në Fllakë, duke drejtuar mjetin tip "Audi", pa leje drejtimi, ka aksidentuar shtetasin S. Rr., 70 vjeç dhe më pas është larguar nga vendngjarja.
Materialet i kaluan Prokurorisë së Rrethit Gjyqësor Durrës, për veprime të mëtejshme.
