Aleanca PS-FRD për Korçën, PD: Topi patericë lokale e Ramës
Nga OraNews Përditësimi i fundit 1 Nëntor 2013, 13:25
Partia Demokratike akuzoi sot ish-presidentin e vendit dhe kryetarin e Frymës së Re Demokratike se po shërben si patericë lokale e Partisë Socialiste dhe kryetarit të saj Edi Rama. Në një deklaratë për mediat zëdhënësja e selisë blu, Silvi Bardhi, duke ju referuar marrëveshjes PS-FRD për zgjedhjet lokale në Korçë tha se dy partitë po përdorin Bashkinë e qytetit juglindor për të mbyllur pazaret për ndarjen e tortës së pushtetit.“Dje, e frikësuar nga mbështetja e fuqishme e qytetarisë korçare për kandidatin e Partisë Demokratike dhe opozitës, zotin Sotiraq Stratobërdha, Partia Socialiste hodhi në lojë aleancën me ish-presidentin Bamir Topi, të cilin e kishte mbajtur rezervë dhe të pashpallur publikisht deri dje.Në shkëmbim, siç njoftohet gjerësisht në mediat e sotme, kryeministri Rama po bën gati thërrimet dhe kockat e mbetura nga gostia e klaneve dhe kioskave socialiste për të shpërblyer shërbimet e paskrupullta. Partia Demokratike shpreh sërish keqardhjen e saj për katandisjen në këtë shkallë të ish - Presidentit të Republikës, i cili u ngjit në postin më të lartë të shtetit me votat e kësaj partie, dhe sot e ka bërë veten të përdoret si patericë lokale e Partisë Socialiste. FRD u krijua si opozitë e qeverisë së Partisë Demokratike, por nuk rezistoi asnjë ditë në opozitë me Partinë Socialiste. Ky është një moment qartësie për çdo zgjedhës që mund të ketë patur ndonjë iluzion apo të jetë mashtruar nga pseudodjathtizmi i saj” tha Bardhi.Duke ju referuar kandidatëve për Bashkinë e Korçës, PD nënvizoi se garon në këtë qytet me kandidatin më të mirë dhe projektin më të mirë për qytetarët e Korçës.“Partia Demokratike është e përqëndruar në komunikimin me qytetarët, dhe qytetarët për ne janë të parët, qytetarët e Korçës dhe kudo në Shqipëri. Prandaj ne kemi si kandidat një qytetar të mirë si z.Stratobërdha, i cili me vizionin dhe programin që ka për t’i shërbyer Korçës, e bën dukshëm diferencën me kandidatin e PS.Partia Demokratike i sheh zgjedhjet në Korçë si një mundësi për të sjellë në Bashkinë e Korçës projektin më të mirë për t’u shërbyer qytetarëve, dhe nuk i sheh ato si një rast për të gatuar prapaskena politike, apo për të shpërblyer klane të ndryshme me tortën e pushtetit.Ndërsa Edi Rama e sheh votimin e ditës së diel si një mundësi për të rregulluar punët në Tiranë, Partia Demokratike ka një projekt për qytetarët e Korçës, ka një kandidat qytetar që kërkon dhe është gati t’u shërbejë korçarëve”përfundoi ajo.Në 3 nëntor për bashkinë e Korçës do të garojnë Sotiraq Filo i PS përballë Sotiraq Stratobërdhës së PD.
