Xabi Alonso i “rrëmben” specialistin Emeryt/ Chelsea synon revolucionin me mjeshtrin e goditjeve standarde
Nga OraNews Përditësimi i fundit 26 Korrik 2026, 19:49
Futbolli modern po ndryshon dhe goditjet standarde janë shndërruar në një nga armët më të fuqishme taktike të skuadrave elitare. Ato nuk shihen më si raste të rastësishme për gol, por si një element i studiuar që mund të vendosë ndeshje dhe trofe.
Në këtë drejtim, Chelsea dhe trajneri i saj Xabi Alonso po përgatitin një lëvizje të rëndësishme, duke synuar afrimin e specialistit të goditjeve standarde, Austin MacPhee, nga Aston Villa.
MacPhee ka qenë një nga figurat kryesore në prapaskenë te skuadra e Unai Emeryt gjatë pesë viteve të fundit, duke ndihmuar Aston Villan të bëhet një prej ekipeve më të rrezikshme në Evropë në situatat e topave të ndalur.
Puna e specialistit skocez ka pasur ndikim të madh në sukseset e Villas, ndërsa kulmi erdhi me triumfin në Ligën e Evropës në muajin maj.
Sipas raportimeve nga Anglia, MacPhee është pranë kalimit te Chelsea, ku do të kishte detyrën të përmirësonte një aspekt ku klubi londinez ka pasur vështirësi në sezonet e fundit. Ai pritet të zëvendësojë Bernardo Cueva dhe të bëhet pjesë e stafit të Xabi Alonsos.
Ky transferim do të ishte një tjetër dëshmi se klubet e mëdha të Premier League po investojnë gjithnjë e më shumë në specialistë të roleve të veçanta taktike.
Për Unai Emeryn, largimi i MacPhee do të ishte një humbje e rëndësishme, pasi skocezi konsiderohej një nga bashkëpunëtorët më të besuar të tij në Aston Villa.
Në një kampionat ku diferencat mes skuadrave shpesh vendosen nga detajet, ekspertët e goditjeve standarde janë kthyer në një avantazh strategjik, dhe Chelsea duket se kërkon ta shfrytëzojë këtë armë për të ndërtuar një skuadër edhe më konkurruese.
