FOTO/ E fshehur për gati 3 mijë vjet! Detektori i metaleve zbulon një mister 2700-vjeçar, gjendet shpata e Epokës së Bronzit pranë Gdanskut
Nga OraNews Përditësimi i fundit 26 Korrik 2026, 09:59
Një shpatë bronzi rreth 2700-vjeçare është zbuluar në një pyll pranë qytetit Gdansk në Poloni, duke tërhequr vëmendjen e arkeologëve për mënyrën e pazakontë të ruajtjes së saj.
Zbulimi u bë nga një person që po kërkonte me detektor metalesh në zonë. Pas një sinjali të fortë nga pajisja, ai nisi gërmimet dhe vetëm disa centimetra nën tokë u shfaq doreza e një shpate të lashtë prej bronzi.
Arkeologët që mbërritën në vendngjarje përcaktuan se arma i përket Epokës së Bronzit të vonë, një periudhë që daton rreth viteve 900-700 para Krishtit.
Pavarësisht mijëra viteve nën tokë, shpata është ruajtur në gjendje të mirë, duke ofruar të dhëna të rëndësishme për jetën dhe kulturën e asaj periudhe.
Ajo që ka zgjuar më shumë interesin e studiuesve është pozicioni i saj. Shpata ishte e vendosur drejt në tokë, një mënyrë që mund të lidhet me një vendosje të qëllimshme, ndoshta si pjesë e një rituali ose oferte simbolike.
Në disa zona të Evropës janë zbuluar më parë armë të Epokës së Bronzit në lumenj, liqene dhe vende të tjera natyrore, ku mendohet se janë lënë për arsye ceremoniale. Megjithatë, një shpatë e ruajtur në këtë pozicion për gati tre mijë vjet konsiderohet një rast i rrallë.
Pas zbulimit, objekti iu dorëzua autoriteteve polake të trashëgimisë kulturore, ku do t’i nënshtrohet analizave shkencore dhe proceseve të konservimit. Studiuesit do të punojnë për të përcaktuar më saktë datimin, mënyrën e prodhimit dhe historinë e saj.
Shpata pritet të ekspozohet më vonë në një muze, duke u bërë pjesë e koleksioneve që tregojnë historinë e qytetërimeve të lashta në Evropë.
View this post on Instagram
