FREDERIKSEN MERR MANDATIN E TRETË / Formohet qeveri e re në Danimarkë, koalicioni me 4 parti
Nga OraNews Përditësimi i fundit 2 Qershor 2026, 12:25
Mete Frederiksen ka siguruar një mandat të tretë si kryeministre e Danimarkës pas arritjes së marrëveshjes për formimin e një qeverie të re pas zgjedhjeve parlamentare. Ajo do të drejtojë një koalicion të gjerë me katër parti, që së bashku nuk kanë shumicën absolute në parlament dhe do të varen nga mbështetja e forcave të tjera.
Socialdemokratja Mette Frederiksen ka siguruar një mandat të tretë si kryeministre e Danimarkës, pas arritjes së një marrëveshjeje për formimin e një qeverie të re koalicioni rreth 10 javë pas zgjedhjeve parlamentare.
Ajo do të drejtojë një kabinet të ri të qendrës së majtë, të përbërë nga katër parti politike: Partia Socialdemokrate, Partia Popullore Socialiste, “Venstre” dhe “Moderaterne”. Ky koalicion u bë i mundur pas javësh të gjata negociatash politike dhe konsultimesh intensive me liderët e partive.
Mbrëmjen e djeshme, Frederiksen informoi mbretin Frederik i 10-të për marrëveshjen e arritur dhe synimin për formimin e qeverisë së re, e cila do të ketë një strukturë të pazakontë me pjesëmarrje të partive nga e majta dhe e djathta e qendrës.
Megjithatë, katër partitë së bashku kontrollojnë 82 mandate në parlamentin danez, duke mbetur nën shumicën absolute prej 90 deputetësh. Për këtë arsye, qeveria e re do të duhet të sigurojë mbështetje të jashtme nga parti të tjera, përfshirë Aleancën e Gjelbër-Kuqve.
Ky mandat i ri shënon qeverisjen e tretë të Frederiksen, pas fitoreve të saj në zgjedhjet e viteve 2019 dhe 2022. Fillimisht ajo kishte dështuar të sigurojë një marrëveshje koalicioni, duke humbur përkohësisht të drejtën për formimin e qeverisë.
Pas dështimit të liderit të “Venstre”, dhe ndërprerjeve të negociatave nga Lars Løkke Rasmussen, Frederiksen u rikthye në krye të procesit politik dhe arriti marrëveshjen përfundimtare.
Ajo pritet të prezantojë prioritetet e qeverisë së re gjatë ditës së sotme, ndërsa ministrat e kabinetit të ri do të paraqiten zyrtarisht nesër para mbretit Frederik i 10-Të.
