GJITHË NJËZËRI PËR SHQIPEN/ Mijëra protestojnë në Shkup për të drejtën e provimeve në gjuhën amtare
Nga Lili Saraçi Përditësimi i fundit 18 Maj 2026, 12:14
Mijëra studentë shqiptarë pritet të protestojnë këtë pasdite në Shkup, duke kërkuar të drejtën për të zhvilluar provimet profesionale në gjuhën shqipe. Me moton “Të gjithë njëzëri”, protesta synon mbrojtjen e gjuhës amtare dhe respektimin e të drejtave kushtetuese të shqiptarëve në Maqedoninë e Veriut.
Shkupi pritet të mbushet me zërin e mijëra studentëve shqiptarë, të cilët do të protestojnë për të drejtën e përdorimit të gjuhës shqipe në provimet profesionale.
Studentët kërkojnë që provimi i jurisprudencës dhe provimet e tjera profesionale të mund të zhvillohen edhe në gjuhën shqipe, ashtu siç garantohet nga ligji për përdorimin e gjuhëve dhe Kushtetuta e Maqedonisë së Veriut.
Gjatë intervistës për Ora News Hava Nasufi shpjegon rëndësinë e Gjuhës Shqipe.
Në mbështetje të protestës kanë reaguar figura publike, artistë dhe përfaqësues politikë shqiptarë nga rajoni.
Studentët paralajmërojnë se protesta e sotme nuk është kundër askujt, por në mbrojtje të një të drejte themelore: të drejtës për të folur, studiuar dhe përfaqësuar profesionin në gjuhën amtare.
Në këtë organizim do të marrin pjesë studentë nga Maqedonia e Veriut, Kosova, Shqipëria dhe vise të tjera shqiptare, të cilët kërkojnë që provimi të mbahet edhe në gjuhën shqipe.
Protesta do të zhvillohet nën moton “Bashkohuni me studentët – të gjithë njëzëri”, ndërsa organizatorët kanë bërë thirrje për pjesëmarrje sa më të madhe qytetare.
“Së bashku para Urës së Gurit për gjuhën tonë”, thuhet në njoftimin e studentëve, ku vihet në pah rëndësia e mbrojtjes së përdorimit të gjuhës shqipe në proceset profesionale dhe institucionale.
Ambasadori i Shqipërisë në Shkup, Denion Meidani, ka dalë në mbështetje të studentëve shqiptarë në Maqedoninë e Veriut
Meidani ka publikuar në rrjetet sociale vargje nga poema “Gjuha Shqype” e poetit dhe publicistit, At Gjergj Fishta i cili me penën e tij të fuqishme lartësoi gjuhën shqipe, i dha zë epopesë historike të shqiptarëve, ndërtoi mitin letrar të qëndresës dhe dinjitetit kombëtar si dhe shndërroi fjalën artistike në akt atdhetarie.
