Bayerni i Mynihut thyen rekordin historik me 122 gola në një sezon të vetëm
Nga OraNews Përditësimi i fundit 16 Maj 2026, 19:30
Bayern ka shkruar historinë e futbollit europian duke vendosur një rekord të ri për numrin më të madh të golave të shënuar në një sezon në pesë ligat më të forta të Europës. Fitorja 5-1 ndaj Kolnit vulosi një edicion të jashtëzakonshëm për bavarezët, të cilët e mbyllën kampionatin me plot 122 gola të realizuar.
Edhe pse titulli ishte siguruar prej javësh, skuadra e drejtuar nga Vincent Kompany e nisi ndeshjen me ritëm të lartë dhe vendosmëri të qartë për të hyrë në histori. Vetëm pak minuta pas fillimit, Harry Kane zhbllokoi sfidën me një goditje volej pas një krosimi të Lennart Karl, duke sinjalizuar ofensivën e pandalshme të Bayernit.
Anglezit nuk iu desh shumë për të dyfishuar shifrat, këtë herë me një goditje të saktë nga një goditje e lirë e ekzekutuar në mënyrë kreative në kufijtë e zonës. Me këtë ritëm, Bayerni ishte shumë pranë rekordit historik që kërkonte 121 gola në një sezon të vetëm.
Megjithatë, Kolni reagoi me një gol të bukur nga Said El Mala, i cili përshkoi gjysmën e fushës për të mposhtur portierin vendas, duke ngushtuar përkohësisht diferencën.
Reagimi i kampionëve ishte i menjëhershëm. Tom Bischof riktheu avantazhin e dyfishtë pas një asisti të Karl, ndërsa në pjesën e dytë Bayern vazhdoi të ushtronte presion të pandalshëm. Jamal Musiala dhe Luis Díaz patën mundësi të pastra për të shënuar, por mungesa e saktësisë dhe shtylla i mohuan golat.
Momenti historik erdhi në minutën e 73-të, kur Harry Kane kompletoi “hat-trick”-un me një goditje të fuqishme nga distanca, duke barazuar rekordin e mëparshëm prej 121 golash në një sezon.
Por Bayern nuk u ndal aty. Në minutat e fundit, Nicolas Jackson vulosi fitoren dhe rekordin e ri, duke shënuar golin e 122-të të sezonit. Ky sukses konfirmon dominimin absolut të bavarezëve, të cilët jo vetëm fituan kampionatin, por e bënë atë në mënyrë historike dhe të paharrueshme.
Harry Kane e mbylli kampionatit me 36 gola, pra me një mesatare me shumë se një gol për ndeshje.
