Kur dashuria kthehet në kontroll, psikologia Krisalda Sauli: Ja si të dalloni marrëdhënien toksike
Nga Katerina Hysenllari Përditësimi i fundit 13 Maj 2026, 11:48
Kufiri mes kujdesit dhe kontrollit, apo mes dashurisë dhe manipulimit, shpeshherë është i hollë dhe i vështirë për t'u dalluar.
Në një diskutim në “Ora News” mbi dinamikat e marrëdhënieve moderne, psikologia Krisalda Sauli, vuri në pah se koncepte tradicionale si ideja që "pa xhelozi nuk ka dashuri", po rishikohen me një sy më kritik.
Këto shprehje klishe, tha ajo, dikur të pranuara gjerësisht si shenja pasioni, tani po shihen me skepticizëm në rritje.
Ndryshimi i kohërave dhe hapja gjithnjë e më e madhe ndaj njohurive psikologjike ka ndikuar në një ndërgjegjësim më të lartë kolektiv. Njerëzit po bëhen më të aftë për të kuptuar pozitat dhe dinamikat brenda një marrëdhënieje, duke sfiduar normat e vjetra që shpesh justifikonin sjellje kontrolluese.
Ky ndërgjegjësim po i ndihmon individët të bëjnë dallimin mes një marrëdhënieje të shëndetshme dhe një marrëdhënieje ku kujdesi është vetëm një maskë për kontroll.
Megjithatë, ndërsa shoqëria ndërgjegjësohet, format e manipulimit evoluojnë. Sipas psikologes, edhe pse shprehjet e dikurshme mund të mos jenë aq praktikisht manipuluese apo toksike sot, ato thjesht shndërrohen.
Thelbi i qasjes kontrolluese mbetet i njëjtë, por mënyra se si komunikohet ndryshon dhe tjetërsohet për t'iu përshtatur normave të reja sociale. Kjo do të thotë se manipulimi bëhet më i vështirë për t'u identifikuar.
Në këtë kontekst, lind pyetja thelbësore, veçanërisht për brezat e rinj: çfarë këshillash duhen për të ndërtuar marrëdhënie vërtet të shëndetshme dhe të balancuara?
Kjo, tha Sauli, mbetet sfida kryesore për të rinjtë që lundrojnë në kompleksitetin e lidhjeve romantike në ditët e sotme.
