TËRMET TE TË KUQTË/ Halili: Shkarkimi i Kërnajës nga Partizani i hap rrugën Dinamos për në “Final Four”

Nga Anila Zyberaj Përditësimi i fundit 30 Prill 2026, 17:16

Për gazetarin Erjon Halili një vendim i papritur dhe i pakuptueshëm është vendimi i klubit të Partizanit për të shkarkuar trajnerin Orges Kërnaja vetëm tre javë para përfundimit të sezonit të rregullt.

Në një intervistë për emisionin “Sport Focus”, në “Ora News” Halili tha se humbja në derbi ndaj Tiranës duket se ka qenë “pika që derdhi kupën” për drejtuesit, të cilët vendosën të shkarkojnë trajnerin Kërnaja, i dyti që largohet nga stoli i të kuqve këtë sezon.

Largimi vjen në një moment delikat, ku Partizani ndodhej në një krizë rezultatesh prej gjashtë-shtatë javësh pa fitore, një ecuri që ka penalizuar rëndë skuadrën në garën për një vend në “Final Four”.

Megjithatë, ajo që e bën vendimin edhe më të çuditshëm, sipas Halilit, është fakti se klubi nuk ka emëruar një pasues, por ia ka lënë drejtimin e ekipit në dorë ndihmësve dhe drejtorit sportiv. Ky veprim është cilësuar nga gazetari si “paradoksal” dhe një zgjidhje që praktikisht e lë skuadrën pa trajner në fazën më vendimtare.

Ironikisht, shkarkimi i Kërnajës vjen pas një periudhe ku puna e tij në krye të Partizanit ishte vlerësuar si e shkëlqyer. Pavarësisht se u prit me skepticizëm në fillim, Kërnaja arriti të merrte rezultate shumë të mira dhe të rigjallëronte një ekip me shumë probleme.

Nën drejtimin e tij, Halili tha se lojtarë të lënë në harresë nga trajnerët e mëparshëm u bënë protagonistë, duke treguar një nivel të lartë loje.

Përveç krizës së rezultateve të muajit të fundit, ecuria e Partizanit me Kërnajën në stol ishte pozitive, duke e rikthyer ekipin në luftë për objektivat. I vetmi kritikim ndaj tij lidhej me aspektin komunikativ, ku deklaratat e tij shpesh u bënë objekt debati.

Kjo situatë kaotike te Partizani duket se i ka hapur plotësisht rrugën rivalit direkt për vendin e katërt, Dinamos. Të dyja skuadrat janë me pikë të barabarta, por ndodhen në pole të kundërta për sa i përket formës dhe moralit.

Dinamo ka gjetur veten në javët e fundit, është kualifikuar në finalen e Kupës së Shqipërisë dhe ka rigjetur formën e lojtarëve kyç si Denison Bregu. Analistët e shohin Dinamon si favorite të qartë për të siguruar biletën e fundit për “Final Four”.

Për më tepër, për Partizanin ekziston edhe një faktor dekurajues: edhe nëse e sigurojnë vendin e katërt, mund të mbeten sërish jashtë Europës, nëse Dinamo arrin të fitojë Kupën e Shqipërisë.

Në këtë kontekst, duket se Dinamo ka një avantazh të dyfishtë, ndërsa Partizani, me një vendim që ka lënë shumë pikëpyetje, rrezikon të humbasë gjithçka në fundin e një sezoni turbulent.