Armëpushimi 10-ditor Izrael-Liban nis me shkelje, SHBA paralelisht drejt marrëveshjes me Iranin
Nga OraNews Përditësimi i fundit 17 Prill 2026, 08:53
Konflikti në Lindjen e Mesme ka hyrë në ditën e 49-të, ndërsa përpjekjet për uljen e tensioneve vazhdojnë në disa drejtime.
Një armëpushim 10-ditor mes Izraelit dhe Libanit ka nisur së fundmi, pas ndërhyrjes së presidentit amerikan Donald Trump.
Por situata mbetet e paqëndrueshme, pasi vetëm pak orë më pas ushtria libaneze raportoi shkelje të marrëveshjes nga ana e Izraelit.
Përplasjet mes Izraelit dhe Hezbollah kanë qenë të forta që nga fillimi i konfliktit, duke rritur tensionet në gjithë rajonin.
Në përpjekje për të qetësuar situatën, Trump ka ftuar përfaqësuesit e të dy vendeve për bisedime në Shtëpinë e Bardhë.
Në të njëjtën kohë, ka lëvizje edhe në planin diplomatik me Iranin.
Sipas informacioneve nga zyrtarë iranianë, bisedimet me Shtetet e Bashkuara, të ndërmjetësuara nga Pakistani, kanë shënuar disa hapa përpara. Megjithatë, mbeten çështje të vështira për t’u zgjidhur, sidomos ajo e programit bërthamor.
Trump ka folur për një klimë më pozitive mes palëve, ndërsa pritet një tjetër raund bisedimesh në Islamabad.
Pavarësisht këtyre zhvillimeve, paralajmërimet nga ushtria amerikane tregojnë se situata mbetet e ndjeshme. Autoritetet ushtarake në SHBA bëjnë të ditur se forcat janë në gatishmëri dhe se çdo përshkallëzim i ri është i mundur në çdo moment.
