BE dhe NATO forcojnë bashkëpunimin! Evropa synon rritje investimesh në mbrojtje ushtarake
Nga Katerina Hysenllari Përditësimi i fundit 16 Prill 2026, 17:01
Bashkimi Evropian dhe NATO kanë rënë dakord të intensifikojnë bashkëpunimin e tyre në javët në vijim, duke u fokusuar në rritjen e investimeve dhe prodhimit në industrinë e mbrojtjes, në përgjigje të kërcënimeve në rritje globale. Ky koordinim pritet të kulmojë në samitin e ardhshëm në Ankara, ku liderët synojnë të përcaktojnë hapa konkretë për një partneritet më të fortë dhe një Evropë më të aftë në fushën e sigurisë.
Presidentja e Komisionit Evropian, Ursula von der Leyen, ka njoftuar se Bashkimi Evropian dhe NATO do të punojnë në javët e ardhshme për të forcuar marrëdhëniet mes tyre, në një kohë kur kërcënimet globale të sigurisë janë në rritje.
Deklarata erdhi pas një takimi në Bruksel me Sekretarin e Përgjithshëm të NATO-s, Mark Rutte, ku të dy liderët diskutuan përgatitjet për samitin e ardhshëm të aleancës dhe nevojën për të rritur kapacitetet mbrojtëse të Evropës.
Von der Leyen theksoi se Evropa duhet të investojë më shumë në industrinë e mbrojtjes. Ajo nënvizoi se bashkëpunimi më i ngushtë mes Bashkimit Evropian dhe NATO-s është thelbësor për të garantuar stabilitetin dhe sigurinë në rajon dhe më gjerë.
Sipas saj, përgatitjet për samitin e ardhshëm në Ankara do të jenë një moment kyç për të përcaktuar drejtimin e ardhshëm të këtij bashkëpunimi.
"Ne duhet të investojmë më shumë, të prodhojmë më shumë dhe t'i bëjmë të dyja më shpejt. Me rritjen e kërcënimeve globale të sigurisë, ne ramë dakord të punojmë ngushtë së bashku në javët e ardhshme për të forcuar marrëdhëniet BE-NATO dhe për të përgatitur një Samit të suksesshëm në Ankara", tha ajo.
Nga ana e tij, Mark Rutte deklaroi se një Evropë më e fortë përkthehet drejtpërdrejt në një NATO më të fortë, duke theksuar rëndësinë e unitetit dhe investimeve të përbashkëta në mbrojtje.
Këto zhvillime vijnë në një kohë tensionesh të shtuara globale dhe konflikteve të vazhdueshme, duke shtuar presionin mbi vendet evropiane për të rritur shpenzimet ushtarake dhe për të përmirësuar gatishmërinë e tyre mbrojtëse.
