13 viktima nga sulmet në Ukrainë, Rusia kërcënon vendet e Bashkimit Evropian

Nga OraNews Përditësimi i fundit 16 Prill 2026, 16:47

Të paktën 13 persona janë vrarë nga sulmet ruse në disa qytete të Ukrainës, ndërsa Moska paralajmëron Bashkimin Evropian se rritja e prodhimit të dronëve për Kievin mund ta përfshijë Evropën drejtpërdrejt në konflikt.

Një valë e re sulmesh me raketa dhe dronë nga Rusia ka goditur disa qytete të Ukrainës, duke lënë të paktën 13 viktima dhe dhjetëra të plagosur.

Goditjet u regjistruan në Kiev, Dnipro dhe Odesa, ku ndërtesa banimi dhe zona të populluara u përfshinë nga flakët. Në kryeqytet, mes viktimave është edhe një djalë 12-vjeçar, ndërsa një pallat 16-katësh u dëmtua rëndë, duke detyruar ekipet e shpëtimit të kërkojnë për të mbijetuar nën rrënoja.

Në Dnipro, dy persona humbën jetën dhe disa të tjerë u plagosën, ndërsa në Odesa raportohen gjashtë viktima si pasojë e sulmeve të njëpasnjëshme. Ndërkohë, në Kharkiv, një sulm me dron plagosi dy të moshuar.

Sulmet vijnë vetëm pak ditë pas një armëpushimi të përkohshëm gjatë festës së Pashkëve Ortodokse, i cili u shoqërua me akuza të ndërsjella për shkelje nga të dyja palët.

Në të njëjtën kohë, tensionet janë rritur edhe më tej në nivel ndërkombëtar. Ministria ruse e Mbrojtjes ka paralajmëruar Bashkimin Evropian se planet për të rritur prodhimin dhe furnizimin me dronë për Ukrainën përbëjnë një përshkallëzim të rrezikshëm të konfliktit.

Sipas Moskës, disa vende evropiane po shtojnë prodhimin e mjeteve ajrore pa pilot, duke e përfshirë gjithnjë e më shumë Evropën në luftë. Madje, autoritetet ruse publikuan edhe një listë fabrikash dhe industrish në vende të ndryshme evropiane që, sipas tyre, prodhojnë dronë për Ukrainën.

Deklaratat u përforcuan edhe nga zëvendëskryetari i Këshillit të Sigurisë së Rusisë, Dmitry Medvedev, i cili paralajmëroi se këto objekte mund të konsiderohen objektiva të mundshëm ushtarakë në të ardhmen.

Ndërkohë, përpjekjet për paqe mbeten të bllokuara. Ukraina kërkon një armëpushim të menjëhershëm, ndërsa Rusia këmbëngul në një marrëveshje të plotë përpara ndalimit të luftimeve.

Lufta në Ukrainë hyn tashmë në vitin e saj të pestë, ndërsa tensionet mes Rusisë dhe Perëndimit vazhdojnë të rriten, duke shtuar frikën për një përshkallëzim edhe më të gjerë të konfliktit.