42 amerikanë betohen si vullnetarë të rinj të Korpusit të Paqes në Shqipëri
Nga OraNews Përditësimi i fundit 4 Prill 2026, 08:25
Të premten, 42 amerikanë kanë bërë betimin për t’u angazhuar si vullnetarë të Korpusit të Paqes në Shqipëri për dy vjet.
Sipas njoftimit të ambasadës së Shteteve të Bashkuara të Amerikës, e pranishme në këtë ceremoni ishte edhe e Ngarkuara me Punë e ShBA-ve, Nancy VanHorn dhe ministrja e Arsimit, Mirela Kumbaro.
“Ndërsa Shtetet e Bashkuara shënojnë 250 vjet pavarësi, kujtojmë se historia jonë shpesh është formësuar nga qytetarë të zakonshëm që bëjnë një hap përpara për të shërbyer. Kjo është fryma që përfaqëson Korpusi i Paqes: Amerikën në më të mirën e saj, duke ndërtuar partneritete me rëndësi dhe miqësi që zgjasin”, tha E Ngarkuara me Punë Nancy VanHorn.
VanHorn tha se Amerika është një vend bujar dhe se populli i saj është punëtor, i përkushtuar ndaj shërbimit, krijues dhe i ngrohtë.
“Vullnetarët e Korpusit të Paqes janë mishërimi i gjallë i këtyre cilësive. Dua të falënderoj Ministrinë e Arsimit dhe të gjithë partnerët tanë shqiptarë mësuesit, drejtuesit e shkollave, zyrtarët vendorë dhe shoqërinë civile, të gjithë ata që do të punojnë krah për krah me këta vullnetarë. Përkushtimi juaj e sjell në jetë misionin e Korpusit të Paqes në klasa dhe komunitete në të gjithë Shqipërinë”, vijoi ajo.
E Ngarkuara me Punë e ShBA-ve falënderoi edhe familjet pritëse shqiptare që i mirëpritën vullnetarët në shtëpitë e tyre gjatë trajnimit.
“Qëkur Shqipëria ftoi për herë të parë Korpusin e Paqes në vitin 1992, gati 1,000 amerikanë kanë jetuar dhe punuar në komunitete në mbarë vendin duke bashkëdhënë mësim të gjuhës angleze, duke mbështetur mirëqenien e të rinjve dhe duke forcuar organizatat vendase. Grupi i sotëm e çon përpara me krenari këtë trashëgimi”, tha VanHorn, ndërsa e konsideroi Shqipërinë vendin më të mirë në botë për të qenë një diplomat amerikan, por edhe një vullnetar.
