Skandali në Livadhë/ SPAK kërkon rikthimin e Jorgo Goros pas hekurave, ish-kryebashkiakut i mbeten 6 muaj dhe 10 ditë burg
Nga Edison Vatnikaj Përditësimi i fundit 31 Mars 2026, 15:34
SPAK ka kërkuar rikthimin në burg të Jorgo Goros, pasi Apeli i Gjykatës së Posaçme konfirmoi dënimin me 2 vite burg.
Prokuroria e Posaçme bën me dije se Jorgo Goro i ka mbetur për të vuajtur edhe 6 muaj e 10 ditë burg. Ai u lirua më 29 gusht 2025.
Urdhri për ekzekutimin e burgimit i është kaluar Policisë së Shtetit, por deri tani nuk është zbatuar. Ndërkohë, në Gjykatën e Posaçme, përmes avokatëve mbrojtës, Goro ka kërkuar revokimin e zbatimit të vendimit të burgimit.
Më 25 mars të këtij viti, Gjykata e Apelit la në fuqi dënimin me 2 vite burg për Jorgo Goron, lidhur me dosjen e tjetërsimit të një prone në zonën e Livadhës.
Më 30 korrik 2025, Goro u dënua me 2 vite burg për shpërdorim detyre të kryer më shumë se një herë dhe në bashkëpunim. Për shkak të gjykimit të shkurtuar, dënimi iu ul në 1 vit e 4 muaj heqje lirie. Çështjen ai e apeloi.
Gjithashtu, Goro është dënuar me 5 vite ndalim për të mbajtur funksione publike.
Ai u kallëzua nga Fredi Beleri, me pretendimin se i kishte dhuruar në vitin 2016 pasuesit të tij, të komanduar në krye të Bashkisë, Arqile Bollanos, 4,263 metra katrorë tokë.
