Përkujtimi i 29-vjetorit të Tragjedisë në Otranto/ Familjarët e viktimave në Vlorë mblidhen për të nderuar humbjen e tyre
Nga OraNews Përditësimi i fundit 28 Mars 2026, 10:39
Në Vlorë është mbajtur këtë të shtunë përkujtimi i 29-vjetorit të Tragjedisë së Otrantos, një nga ngjarjet më të rënda në historinë e vendit, ku humbën jetën 81 persona.
Familjarë të viktimave, përfaqësues të pushtetit vendor dhe qendror, si dhe qytetarë të shumtë u mblodhën pranë bregdetit për të nderuar kujtimin e atyre që humbën jetën.
Me iniciativë të ministres Erjona Ismaili, 81 karrige u vendosën buzë detit për të simbolizuar jetët e ndërprera, ndërsa hedhja e luleve në det shërbeu si homazh i heshtur.
Në përkujtim morën pjesë edhe prefekti i Vlorës, kryetarja e bashkisë, si dhe këngëtarja Xhesika Polo, e cila këndoi një këngë vaji për viktimat.
Familjarët shprehën dhimbjen dhe zhgënjimin e tyre, duke thënë se tragjedia mund të ishte shmangur dhe se vendimet e drejtësisë italiane nuk reflektojnë plotësisht të vërtetën.
Tragjedia ndodhi më 28 mars 1997, kur një anije shqiptare me 115 persona në bord u përplas dhe u përmbys në kanalin e Otrantos gjatë një operacioni të forcave detare italiane.
Nga aksidenti humbën jetën 81 persona, përfshirë fëmijë të moshave 3 muajsh deri në 69 vjeç, që kërkonin një jetë më të mirë jashtë vendit në kohë trazirash të thella.
