IRANI I DOBËSUAR PAS SULMEVE/ Inteligjenca: Regjimi iranian mbetet në këmbë, por i dëmtuar
Nga OraNews Përditësimi i fundit 19 Mars 2026, 14:24
Në një seancë në Kongres, drejtuesja e inteligjencës amerikane Tulsi Gabbard deklaroi se Irani është ende funksional, por i dobësuar ndjeshëm. Dëshmia vjen mes debateve mbi kërcënimin real dhe arsyet e ndërhyrjes ushtarake.
Drejtuesja e Inteligjencës Kombëtare të SHBA-së, Tulsi Gabbard, deklaroi se regjimi iranian mbetet në këmbë, por është “i dobësuar ndjeshëm” pas sulmeve ndaj strukturave të tij ushtarake dhe drejtuesve kryesorë. Ajo foli gjatë një seance dëgjimore në Kongres, ku zyrtarë të lartë të administratës amerikane raportuan mbi kërcënimet globale ndaj SHBA-së.
Seanca, e cila zgjati mbi dy orë, ishte raportimi i parë publik mbi inteligjencën që nga fillimi i luftës në fund të shkurtit. Ajo u zhvillua një ditë pasi drejtori i Qendrës Kombëtare Kundër Terrorizmit, Joe Kent, dha dorëheqjen duke deklaruar se Irani nuk përbënte një kërcënim të menjëhershëm për SHBA-në dhe duke kritikuar vendimin për sulmet.
Gabbard theksoi se komuniteti i inteligjencës vlerëson se regjimi në Iran është ende funksional, por ka pësuar goditje të mëdha në kapacitetet ushtarake dhe në lidership. Ajo shmangu të përgjigjej drejtpërdrejt nëse Irani përbënte një kërcënim të menjëhershëm, duke theksuar se një përcaktim i tillë i takon presidentit.
Nga ana tjetër, drejtori i CIA-s, John Ratcliffe, deklaroi se Irani ka qenë një kërcënim i vazhdueshëm për SHBA-në dhe se në këtë fazë përbënte edhe një rrezik të menjëhershëm. Këto qëndrime kontradiktore pasqyrojnë debatet brenda administratës mbi arsyetimin e ndërhyrjes ushtarake.
Gjatë dëgjimit u diskutua edhe ngushtica e Hormuzit, një rrugë kyçe për transportin global të naftës. Sipas Gabbard, inteligjenca amerikane kishte parashikuar rrezikun që Irani të ndërhynte në këtë zonë dhe Pentagoni kishte marrë masa parandaluese për mbrojtjen e interesave energjetike.
