Presidenti, orët vendimtare/ Zefaj: Kurti kishte ide të tjera, Osmani nuk ka qenë kandidate për presidente
Nga Lili Saraçi Përditësimi i fundit 4 Mars 2026, 12:16
Lëvizjet e fundit politike në prag të zgjedhjes së presidentit të ri të vendit po cilësohen si politikisht të pandershme dhe profesionalisht jokorrekte. Ngërçi i krijuar për emrin e kreut të shtetit ka vënë në pah një strategji të paparashikuar nga ana e kryeministrit Albin Kurti, duke e lënë vendin në një pasiguri politike.
Sipas analistit politik Engelbert Zefaj, kjo situatë buron nga një ndryshim qëndrimi i zotit Kurti, i cili duket se ka pasur ide të tjera përtej marrëveshjes së pashprehur me Vjosa Osmanin.
Elektorati i përbashkët i Lëvizjes Vetëvendosje dhe nismës së zonjës Osmani priste që pas zgjedhjeve të mos kishte fare diskutim për ndarjen e posteve kryeministër-president. Megjithatë, zhvillimet e fundit tregojnë se Vjosa Osmani mund të mos ketë qenë asnjëherë kandidatja reale që Kurti ka menduar ta propozojë për një mandat të plotë.
"Menaxhimi i këtij procesi kritik konsiderohet gjithashtu një gabim profesional. Lënia e një vendimi kaq të rëndësishëm për orët e fundit, veçanërisht kur nuk ekziston një emër tjetër i pranuar nga të gjitha palët, ka thelluar krizën. Palët politike tashmë janë pozicionuar në mënyrë të prerë, duke e bërë gjetjen e një zgjidhjeje të përbashkët thuajse të paarritshme."
E vetmja alternativë që shihet si dalje nga ky ngërç është propozimi i një kandidature konsensuale nga partitë opozitare. Një zgjidhje e tillë do të kërkonte kompromis nga mazhoranca. Megjithatë, sinjalet nga kryeministri Kurti lënë të kuptohet se një opsion i tillë nuk pranohet, duke e lënë të hapur fatin e postit të presidentit dhe duke rrezikuar zgjedhje të reja.
NDIQNI INTERVISTËN E PLOTË:
