Xhixho: Protesta pati pjesëmarrje të jashtëzakonshme, por u përball me dhunë të njëanshme
Nga OraNews Përditësimi i fundit 21 Shkurt 2026, 12:47
Zëvendëspresidentja e Partisë së Lirisë, Erisa Xhixho, ka komentuar protestën e opozitës që u zhvillua mbrëmjen e djeshme, 20 shkurt, para Kryeministrisë.
Ajo vuri në dukje se protesta pati pjesëmarrje të jashtëzakonshme, por u përball me dhunë të njëanshme.
Deputetja e PL u shpreh se në protestë janë parë persona të infiltruar, ndërsa shtoi se në selinë e PD është hedhur gaz lotsjellës, ndërkohë që demokratët po kërcënoheshin dhe po mbaheshin nën terror.
“Vetëm dy ditë më parë në Kuvend u shpalosën disa alternativa nga deputetët e opozitës, duke nisur nga TVSH për ushqimet, me sigurinë ushqimore, me propozimet e zonjës Tabaku për minatorët, për Akcizën apo dhe pagat e mësuesve, të cilat u hodhën të gjitha në kosh me arrogancë nga mazhoranca.
Opozita do të duhet të përmirësohet, do të duhet të japim më shumë mesazhe për vizonin tonë. Por mendoj se protesta e djeshme, që kishte pjesëmarrje të jashtëzakonshme. Dje kishte një dhunë të njëanshme.
Dje ministrja tha se nuk do të mbante përgjegjësi për dhunën në protestë. Kemi parë të infiltruar në protestë. Është hedhur gaz lotsjellës në selinë e PD. Po kërcënoheshin dhe po mbaheshin nën terror demokratët.”, tha Xhixho.
