FOTO+VIDEO/ Rama fjalim në mbledhjen e parë të Bordit të Paqes, Trump falenderon Kryeministrin për pjesëmarrjen
Nga OraNews Përditësimi i fundit 19 Shkurt 2026, 15:21
Është zbardhur lista e vendeve përfaqësuese, krerët e të cilave do të mbajnë fjalim këtë të enjte në takimin e Bordit të Paqes të thirrur nga Donald Trump në Washington.
Shumica e vendeve europiane e kanë refuzuar ftesën e Trump dhe nuk do të jenë pjesë e takimit, ndërkohë sipas listës, përpos Donald Trump dhe përfaqësuesve amerikanë, një fjalim do ta mbajë edhe Edi Rama, i cili u nis me eufori një ditë më parë drejt Washingtonit, për të marrë pjesë në takim.
Sipas listës Shqipëria është renditur pas Kazakistanit dhe Uzbekistanit, ku së bashku me vendet e tjera përfaqësuese pritet të mbajnë një fjalim të shkurtër, ku do të njoftojnë edhe kontributet e tyre në përpjekjet e rindërtimit të Gazës.
Vetë Edi Rama ka deklaruar pak ditë më parë se “Shqipëria nuk do të kontribuojë me para për t’u anëtarësuar apo për të qëndruar si anëtare e përhershme e bordit, por ndërkohë Trump ka thënë të kundërtën.
Presidenti amerikan ka deklaruar se gjatë takimit, Bordi i Paqes do të shpallë pesë miliardë dollarë ndihma të premtuara për humanitarizëm dhe rindërtim në Gaza.
Mbetet për tu parë si do të vijojë procesi dhe çfarë kontributi do të japë Shqipëria në procesin e rindertimit dhe rimëkëmbjes së Gazës.
AGJENDA E PLOTË:
Mbledhja Inauguruese e Bordit të Paqes
Instituti Amerikan i Paqes “Donald J. Trump”
06:15 (me orën amerikane) – Fillojnë mbërritjet e delegacioneve- 12:15 (ora në Shqipëri)
08:05 (me orën amerikane) – Përfundojnë mbërritjet e delegacioneve- 14:05 (ora në Shqipëri)
08:40 (me orën amerikane) – Foto familjare- 14:40 (ora në Shqipëri)
09:00 (me orën amerikane) – Fillon mbledhja- 15:00 (ora në Shqipëri)
Fjalë mirëseardhjeje dhe hapëse nga Presidenti dhe Zëvendëspresidenti i Shteteve të Bashkuara
Prezantime në tryezë të rrumbullakët & Përditësime kryesore
1. Sekretari Rubio – Natyra historike e mbledhjes së BoP
2. Steve Witkoff – Suksesi në lirimin e pengjeve dhe koordinimi i ndërmjetësve
3. Ambasadori Mike Waltz – Ndihma dhe adresimi i nevojave aktuale të Gazës
4. Dr. Ali Shaath – NCAG, e ardhmja e Gazës (3 minuta fjalë)
5. Nick Mladenov – OHR & Demilitarizimi
6. Gjeneral Major Jeffers – ISF & Policia e Gazës
7. Tony Blair – Ngritja e kapaciteteve & Zhvillimi organizativ
8. Yakir Gabay – Rindërtimi / Plani i Përgjithshëm (Master Plan)
9. Liran Tancman – Zinxhiri i furnizimit & Teknologjia
10. Marc Rowan – Fondi Sovran i Pasurisë
11. Presidenti i Bankës Botërore, Ajay Banga – Përgjegjësia fiskale / transparenca dhe Fondi Sovran
12. Jared Kushner – Rezultate të matshme të BoP në Gaza dhe ndikimi i ardhshëm i BoP
Video për rindërtimin e Gazës
Ndërhyrjet
Rendi:
1. Bahreini – Mbreti Hamad bin Isa Al Khalifa
2. Kazakistani – Presidenti Kassym-Jomart Tokayev
3. Uzbekistani – Presidenti Shavkat Mirziyoyev
4. Indonezia – Presidenti Prabowo Subianto
5. Rumania – Presidenti Nicușor Dan
6. Shqipëria – Kryeministri Edi Rama
7. Egjipti – Kryeministri Mostafa Madbouly
8. Katari – Kryeministri Mohammed Al-Thani
9. Emiratet e Bashkuara Arabe – Zëvendëskryeministër dhe Ministër i Punëve të Jashtme Sheikh Abdullah Bin Zayed Bin Sultan Al-Nahyan
10. Maroku – Ministri i Jashtëm Nasser Bourita
11. Turqia – Ministri i Jashtëm Hakan Fidan
12. Kuvajti – Ministri i Jashtëm Sheikh Jarrah Jaber Al-Ahmad Al-Sabah
13. Arabia Saudite – Ministri i Shtetit për Punët e Jashtme Adel Al-Aljub
Prezantim video nga FIFA
Rezoluta & Votimet e Bordit
Ndërkaq, presidenti i Shteteve të Bashkuara të Amerikës, Donald Trump, ka përshëndetur kryeministrin e Shqipërisë Edi Ramën dhe presidenten e Kosovës Vjosa Osmanin, gjatë fjalimit të tij në Bordin e Paqes që po mbahet në Uashington.
“Jemi të nderuar që na është bashkuar kryeministri i Shqipërisë Edi Rama”.
Ndërsa për presidenten Osmani tha se po bën një punë të madhe.
“Sot jemi të nderuar se na bashkohet kryeministri Rama i Shqipërisë. Presidenti i Argjentinës, e mbështes. Kur më pëlqejnë njerëzit i mbështes. Tani mbështes liderët e huaj, duke përfshirë Viktor Orbanin e Hungarisë. Kam mbështetur kryeministren e Japonisë që fitoi garën më të fundit. Kemi presidenten Osmani, faleminderit, po bëni një punë të madhe” – u shpreh Trump.
