RRITEN FITIMET E BANKAVE! 239 miliardë lekë të ardhura nga interesat e kredive në 2025
Nga OraNews Përditësimi i fundit 16 Shkurt 2026, 15:31
Bankat në Shqipëri rritën të ardhurat gjatë vitit 2025, të nxitura nga interesi i kredive dhe nga tarifat bankare, ndërsa shpenzimet mbetën të kontrolluara, sipas të dhënave të Bankës së Shqipërisë
Bankat e nivelit të dytë që operojnë në Shqipëri arkëtuan mbi 239 miliardë lekë nga interesi i kredive të dhëna përgjatë gjithë vitit 2025.
Sipas të dhënave të Bankës së Shqipërisë, ky tregues rezulton në rritje me 2.3% krahasuar me vitin 2024.
Ndërkohë fitimi nga gjobat dhe komisionet që mbajnë bankat kur kryejmë transaksione arriti në 51.8 miliardë lekë total.
Këto të ardhura janë rritur me rreth 13.6% krahasuar me 45.6 miliardë lekë që ishin në vitin 2024.
Kjo tregon qartë se shërbimet bankare dhe tarifat e arkëtueshme mbeten një burim i fortë fitimi, përtej kredive tradicionale.
Totali i shpenzimeve të bankave shqiptare për vitin 2025 arriti 193.4 miliardë lekë, ku pjesa më e madhe shkuan për shpenzime jo nga interesi, përfshirë pagat e personelit dhe shpenzimet e tjera operative.
Ndërsa shpenzimet për interes dhe provigjonet për kreditë e humbura përbënin pjesën tjetër të kostos totale.
Ky rezultat tregon jo vetëm rritjen e të ardhurave nga interesi, por edhe diversifikimin e burimeve të fitimit dhe menaxhimin efikas të shpenzimeve, duke e bërë sektorin bankar shqiptar më të qëndrueshëm.
