Ministrja Sala: Bashkëpunim me Italinë për ngritjen e Institutit të Tumoreve në Shqipëri
Nga OraNews Përditësimi i fundit 5 Shkurt 2026, 11:56
Ministrja Sala në takim me presidentin e Institutin Kombëtar të Tumoreve në Milano, Galmozzi
Ministrja e Shëndetësisë dhe Mirëqenies Sociale, Evis Sala gjatë vizitës në Institutin Kombëtar të Tumoreve në Milano u takua me presidentin Gustavo Galmozzi.
Gjatë takimit Sala dhe Gustavo diskutuan për ngritjen e Institutit të Tumoreve në Shqipëri.
“Diskutuam për bashkëpunimin konkret për mbështetjen e ngritjes së Institutit të Tumoreve në Shqipëri si një qendër për ndërtimin e kapaciteteve, trajtimin multidisiplinar të kancerit, kërkimin shkencor dhe hartimin e politikave onkologjike të bazuara në evidenca”, theksoi Sala, në një postim në rrjetet sociale.
Ministrja Sala u shpreh se ky partneritet strategjik është i përafruar me standardet europiane, me fokus forcimin institucional dhe zhvillimin e qëndrueshëm të sistemit të kontrollit të kancerit.
Shqipëria po hedh hapa konkretë drejt modernizimit të shërbimit onkologjik, duke synuar standarde europiane në trajtimin e sëmundjeve tumorale.
Gjithashtu Shqipëria dhe Italia do të zgjerojnë bashkëpunimin në forcimin e kapaciteteve, përmirësimin e protokolleve të trajtimit dhe për asistencë në trajtimin e rasteve që kërkojnë kujdes më të specializuar.
