EMRAT/ Skandali i rikonstruksionit të Komisariateve, SPAK kërkon “dënim shembullor”, 11 vite burg për 15 ish-zyrtarët e Ministrisë së Brendshme

Nga OraNews Përditësimi i fundit 29 Janar 2026, 16:24

SPAK ka dhënë pretencën për ish-zyrtarët e Ministrisë së Brendshme, të cilët akuzohen për shkelje procedurash dhe falsifikim dokumentesh në tenderat për rikonstruksionin e katër komisariateve,Vlorë, Tiranë (nr. 4), Pogradec dhe Mirditë.

Prokuroria kërkoi në total 11 vite e 3 muaj burg për 15 të pandehurit, ndërsa për ish-zyrtarët, nëse gjykohen vetëm ata me procedurë të shkurtuar, dënimet do të ulen.

Për 9 ish-zyrtarë, SPAK kërkoi 9 muaj burg, të cilët do të ulen në 6 muaj për shkak të gjykimit të shkurtuar. Për disa prej tyre, dënimi i pezulluar parashikon që të qëndrojnë në shërbim prove për një vit.

Për gratë e përfshira në dosje, SPAK ka kërkuar që ato të mos shkojnë në burg edhe nëse shpallen fajtore. Për burrat, përfshirë Blendi Kovin, është kërkuar 9 muaj burg, i cili ulet në 6 muaj nga gjykimi i shkurtuar.

Prokurorja Dorina Bejko kërkoi gjithashtu heqjen e të drejtës për të ushtruar funksione publike për 5 vjet për të gjithë 15 të pandehurit.

Ndërkohë, çështja ndaj ish-sekretarit të përgjithshëm të Ministrisë së Brendshme, Plarent Ndreca, është ndarë dhe ai do të gjykohet me procedurë të zakonshme.

Në hetime është marrë në pyetje edhe ish-ministri i Brendshëm, Sandër Lleshaj.

Tenderat për supervizimin e katër komisariateve kapnin një vlerë prej rreth 555 mijë euro, dhe SPAK pretendon se janë kryer shkelje të procedurave për të favorizuar një kompani të caktuar.

Të pandehurat

Denisa Skënderaj
Lira Kolari
Lindita Mukaj
Silva Dauti (Kushi)
Grida Isufi
Jonarda Qurku
Julia Hysa (Done)
Elora Kokalari
Aida Shehi

Të pandehurit

Blendi Kovi
Deni Klosi
Ferdinand Tarazhi
Emiliano Mehmeti
Klejdi Meço
Erand Robaçi