BLATTER KËRKON BOJKOT TË BOTËRORIT / Ish-kreu i FIFA-s kundër eventit sportiv të organizuar në SHBA
Nga Andi Kurti Përditësimi i fundit 29 Janar 2026, 14:09
Ish-presidenti i FIFA-s, Sepp Blatter, i është bashkuar thirrjeve për bojkot të ndeshjeve të Kupës së Botës në Shtetet e Bashkuara. Ai mbështeti publikisht idenë e bojkotit për shkak të politikave të administratës Trump.
Ish-presidenti i FIFA-s, Sepp Blatter, ka mbështetur thirrjet për bojkot të ndeshjeve të Kupës së Botës që do të zhvillohen në Shtetet e Bashkuara, duke vënë në dyshim përshtatshmërinë e këtij vendi si pritës i turneut më të madh të futbollit.
Në një postim në rrjetin social X, Blatter u shpreh se pajtohet me deklaratat e juristit zviceran Mark Pieth, i cili kishte këshilluar tifozët të mos udhëtojnë drejt SHBA-së.
Kupa e Botës do të zhvillohet nga 11 qershori deri më 19 korrik, me SHBA-në si organizatore kryesore, në bashkëpunim me Kanadanë dhe Meksikën.
Por shqetësimet në komunitetin ndërkombëtar të futbollit lidhen me politikat e administratës Trump, përfshirë ndalimet e udhëtimit dhe qasjen e ashpër ndaj emigrantëve dhe protestuesve.
Sipas raportimeve, tifozët nga disa vende afrikane, si Senegali dhe Bregu i Fildishtë, janë prekur nga zgjerimi i ndalimeve të udhëtimit, ndërsa shtetasit e Iranit dhe Haitit, vende që janë kualifikuar për Botërorin, nuk do të lejohen të hyjnë në SHBA.
Këto masa kanë shkaktuar pasiguri dhe konfuzion për tifozët që synojnë të ndjekin ekipet e tyre.
Deklaratat e Blatter dhe Pieth pritet të shtojnë presionin mbi FIFA-n dhe organizatorët, në një kohë kur Botërori shihet jo vetëm si ngjarje sportive, por edhe si test politik dhe diplomatik për Shtetet e Bashkuara.
