Temperaturat e ulëta në Qarkun e Elbsanit, shkaktojnë ngrica në disa zona malore dhe rrugë
Nga OraNews Përditësimi i fundit 13 Janar 2026, 11:56
Temperaturat e ulëta kanë përfshirë Qarkun e Elbasanit, duke shkaktuar ngrica në zonat malore dhe në disa segmente rrugore.
Autoritetet kanë ndërmarrë masa preventive për të garantuar sigurinë e qarkullimit.
Në akset nacionale Elbasan–Qafë Thanë dhe Elbasan–Gjinar, për shkak të rënies së temperaturave, është hedhur kripë në pikat problematike, duke mundësuar qarkullimin normal të mjeteve. Gjatë mbrëmjes së djeshme, ekipe të posaçme kanë ndërhyrë me kripë edhe në disa rrugë të qytetit të Elbasanit.
Ndërkohë, situata hidrologjike paraqitet e qëndrueshme. Prurjet e lumit Shkumbin dhe përroit të Zaranikës janë në rënie dhe nuk paraqesin rrezik për popullsinë. Edhe shkarkimet nga HEC Banjë janë ulur, duke arritur në rreth 190 metër kub në sekondë, në përputhje me prodhimin energjetik.
Autoritetet lokale vijojnë monitorimin e situatës dhe u bëjnë thirrje drejtuesve të mjeteve të tregojnë kujdes të shtuar në akset rrugore, për shkak të kushteve të vështira atmosferike.
