INTER MBETET PA PËRFORCIME/ Cancelo zgjodhi Barcelonën, Interi mbetet pa alternativë në krah

Nga OraNews Përditësimi i fundit 6 Janar 2026, 14:28

Pa Dumfries deri në mars, me Darmian të rikthyer nga një mungesë e gjatë dhe Diouf të adaptuar me urgjencë në rol mbrojtës, Interi zgjedh sërish të mos investojë në merkato pas dështimit të pistës Cancelo, duke vendosur të vazhdojë me të njëjtën skuadër — një strategji që sezonin e kaluar u pagua shtrenjtë në pranverë.

Interi përgatitet të vazhdojë rrugëtimin sezonal me të njëjtën strukturë të skuadrës edhe pse kushtet nuk janë ideale.

Dumfries do të mungojë deri në mars, ndërsa Darmian — i rikthyer pas një ndalese të gjatë dhe tashmë 36 vjeç — mbetet një opsion me ngarkesë fizike të lartë. Diouf, i marrë si lojtar për depërtim, është përshtatur me detyrim si mbështetje në të djathtë, në ndihmë të Luis Henrique, i cili së fundmi ka dhënë sinjale përmirësimi.

Me dështimin e pistës Cancelo — i cili preferoi Barcelonën në vend të rikthimit në Milano — klubi ka zgjedhur të mos ndërhyjë në merkato, duke shfrytëzuar deri në maksimum grupin ekzistues. Një strategji e ngjashme me atë të sezonit të kaluar, kur ngarkesa fizike dhe presioni psikologjik ndikuan ndjeshëm në ecurinë e skuadrës në pranverë.

Ashtu si një vit më parë, përgjegjësia bie mbi trajnerin Cristian Chivu, të cilit jo vetëm i kërkohet të konkurrojë, por të udhëheqë garën ndaj rivalëve që ndërkohë përforcohen dhe rinovojnë organikën.

Sa i përket merkatos së janarit, çdo lëvizje pritet të jetë në dalje. Përveç një afrimi të mundshëm për të ardhmen — mbrojtësi kroat Branimir Mlacic, i lindur në vitin 2007 — situata mbetet e pandryshuar për qendrën e mbrojtjes: dështimi i marrëveshjes Cancelo me Al Hilal nënkupton që Acerbi dhe De Vrij do të qëndrojnë deri në skadimin e kontratave në qershor.

Në tryezë qëndron ende mundësia e largimit të Frattesi-t, por tratativa me Galatasaray ka ngecur për shkak të mosmarrëveshjeve mbi formulën e huazimit dhe kushtet e detyrueshme të blerjes. Edhe në rast realizimi, të ardhurat nuk do të përdoren për ndërhyrje të menjëhershme, por do të shërbejnë për bilancin e së ardhmes.

Ideja ishte e qartë: “ose Cancelo, ose asnjë”. Me portugezin tashmë në Barcelonë, Interi mbetet: ashtu si një vit më parë, me të njëjtin grup deri në fund të sezonit