STARTON RALLY DAKAR 2026/ Belgu Guillaume de Mévius fiton etapën e parë të Dakar

Nga OraNews Përditësimi i fundit 5 Janar 2026, 14:52

Guillaume de Mévius ka fituar etapën e parë zyrtare të Dakar 2026 në Yanbu dhe ka marrë kryesimin e përgjithshëm të garës. Rezultati nënvizon konkurrencën mes projekteve teknike dhe skuadrave kryesore në këtë edicion të rallit

Rally Dakar 2026 ka hyrë në fazën e saj të parë konkurruese me zhvillimin e plotë të etapës së parë, një itinerar në formë unaze prej 305 kilometrash të kronometruar me nisje dhe mbërritje në Yanbu, që ka prodhuar edhe renditjen e parë zyrtare të garës.

Fituesi i ditës është Guillaume de Mévius, i cili siguroi kohën më të mirë në finish me Mini John Cooper Works T1+ të ekipit X-Raid, një nga makinat më të vjetra mes atyre pretendente për triumfin, duke treguar se në Dakar suksesi nuk varet gjithmonë nga teknologjia më e re.

Piloti belg nisi me ritëm të lartë, por rreth kilometrin e 70-të u zhduk për disa kohë nga sinjalet e monitorimit për shkak të një defekti në GPS, çka krijoi pasiguri mbi ecjen e tij gjatë etapës.

Megjithatë, incidenti nuk e pengoi të regjistronte kohën më të shpejtë në fund, duke lënë pas me vetëm 40 sekonda diferencë Nasser Al-Attiyah, i cili realizoi një rimontë të shkëlqyer me Dacia Sandrider, pasi kaloi një nga një pesë Ford Raptor që gjendeshin përpara tij në pistë.

Me këtë rezultat, De Mévius bëhet lideri i parë i përgjithshëm i Dakar 2026, një arritje veçanërisht domethënëse duke pasur parasysh projektin teknik më të vjetër të Mini-së së tij krahasuar me rivalët.

Performancë pozitive edhe për Ford, që renditi pesë Raptor në dhjetëshen më të mirë: Mattias Ekström e mbylli në vendin e katërt pasi kishte udhëhequr për një pjesë të mirë të etapës, ndërsa Carlos Sainz u pozicionua i gjashti, Nani Roma i teti dhe Mitchell Guthrie i nënti.

Podiumi i ditës u plotësua nga Martin Prokop, i treti me Ford Raptor të ekipit Orlen Jipocar, ndërsa gara pritet të vijojë me balancë të hapur mes skuadrave kryesore.

STARTON RALLY DAKAR 2026/ Belgu Guillaume de Mévius fiton etapën e