VIDEO/ Kristjan Prenga i papërmbajtshëm në SHBA, mposht amerikanin Carmack në më pak se 30 sekonda
Nga OraNews Përditësimi i fundit 7 Dhjetor 2025, 17:04
Kristjan Prenga ka shënuar një tjetër fitore të shpejtë dhe mbresëlënëse në ringun amerikan, duke triumfuar brenda pak sekondash në duelin e zhvilluar në “Atlantic City”.
Boksieri shqiptar nuk i la asnjë mundësi Brandon Carmack-ut, të cilin e rrëzoi me një seri goditjesh të forta dhe të sakta që detyruan arbitrin ta ndalonte menjëherë përballjen.
Carmack e nisi duelin me agresivitet, por Prenga reagoi me pjekuri dhe vendosmëri, duke e kthyer përplasjen në favor të tij që në sekondat e para.
Goditjet e tij në zonën e ijëve rezultuan vendimtare, duke i prerë ritmin kundërshtarit dhe duke e çuar ndeshjen drejt një mbylljeje të parakohshme.
Me këtë sukses, Prenga e çon në 19 numrin e fitoreve në karrierë, të gjitha të arritura me nokaut – një statistikë që e përforcon statusin e tij si një talent i pashoq në skenën ndërkombëtare.
Atmosfera në “Bally’s Atlantic City” ishte elektrizuese, me tifozët shqiptarë që e mbështetën pa u lodhur dhe që shpërthyen në festë pas një tjetër performance dominuese të bashkatdhetarit të tyre.
