Netanyahu kërkoi falje presidenciale për çështjen e korrupsionit, Herzog: Do t’ia përcjell autoriteteve përkatëse

Nga OraNews Përditësimi i fundit 30 Nëntor 2025, 21:09

Me një video të publikuar në rrjetet sociale, kryeministri izraelit Benjamin Netanyahu njoftoi se i ka kërkuar presidentit të vendit, Isaac Herzog, falje për gjyqin shumëvjeçar të korrupsionit, duke argumentuar se procesi penal po pengon aftësinë e tij për të qeverisur dhe se falja “do të ishte në të mirën e Izraelit”.

“Jam i detyruar të paraqitem tre herë në javë në gjykatë… Kjo është një kërkesë e pamundur, e paprecedent për çdo qytetar tjetër,” tha Netanyahu, duke kujtuar se ka marrë përsëritshëm mandatin e publikut përmes fitoreve elektorale dhe duke përmendur kërkesën e ngjashme që Donald Trump i kishte drejtuar së fundmi Herzogut.

“Pres që kushdo që dëshiron të mirën e vendit ta mbështesë këtë hap,” shtoi ai, në videon e publikuar nga partia e tij, Likud.

Reagimi i Presidentit Herzog: “Kërkesë e pazakontë me pasoja të rëndësishme”

Zyra e presidentit Isaac Herzog e cilësoi kërkesën “të pazakontë” dhe me “implikime të rëndësishme”. Në deklaratë thuhej se:

kërkesa do t’i kalojë departamentit kompetent të Ministrisë së Drejtësisë, sipas praktikës së zakonshme,

do të mblidhen opinionet përkatëse,

të cilat më pas do t’i dorëzohen këshilltarit ligjor të presidentit,

i cili do të hartojë rekomandimin final për presidentin.

Avokatët e Netanyahut argumentojnë se presidenti mund të ndërhyjë kur vihet në rrezik interesi publik, duke thënë se falja do të shërbente për “shërimin e ndarjeve” dhe forcimin e unitetit kombëtar.

Nga ana tjetër, lideri i opozitës, Yair Lapid, tha se Netanyahu nuk duhet të marrë falje pa pranuar fajin, pa shprehur pendesë dhe pa u tërhequr menjëherë nga jeta politike. Edhe politikani opozitar Yair Golan, ish-nënkryetar i ushtrisë, i kërkoi presidentit të mos e miratojë faljen dhe i bëri thirrje Netanyahut të japë dorëheqjen.

Përballë këtyre kritikave, aleatët e Netanyahut në koalicionin qeverisës – përfshirë ministrin e Sigurisë Kombëtare, Itamar Ben-Gvir, dhe ministrin e Financave, Bezalel Smotrich – shprehën publikisht mbështetjen për kërkesën e faljes.

Procesi gjyqësor dhe sfidat politike

Netanyahu u zgjodh për herë të parë kryeministër në vitin 1996 dhe prej atëherë ka ushtruar role të ndryshme në qeveri dhe opozitë. Ai u rikthye në pushtet në vitin 2002 dhe mbetet një nga figurat më të fuqishme në politikën izraelite.

Akuzat kundër tij u ngritën në vitin 2019 në tre çështje të ndara, por të ndërlidhura, që lidhen me dyshime se ai ka favorizuar biznesmenë të njohur në këmbim të dhuratave dhe mbulimit të favorshëm mediatik. Në pesë vite proces, as Netanyahu dhe as avokatët e tij nuk kanë pranuar ndonjëherë fajësi.

Zgjedhjet e radhës në Izrael pritet të mbahen deri në tetor 2026 dhe sondazhet tregojnë se koalicioni aktual, më i djathti në historinë e vendit, mund të ketë vështirësi të sigurojë mjaftueshëm mandate për të formuar qeverinë e ardhshme.