RESHJET MË TË MËDHA NË 300 VJET/ Përmbytje historike në Tajlandë: dhjetëra viktima, miliona të prekur! Situatë kritike edhe në Vietnam e Malajzi
Nga OraNews Përditësimi i fundit 26 Nëntor 2025, 13:34
Pjesë të mëdha të Tajlandës jugore po përballen me përmbytjet më të rënda të regjistruara ndonjëherë, me dhjetëra viktima dhe miliona banorë të prekur. Ndihmat po vonojnë të mbërrijnë në shumë zona të izoluara, ndërsa ushtria ka marrë komandën e operacionit emergjent.
Tajlanda jugore po përjeton përmbytje katastrofike, të cilat kanë shkaktuar të paktën 33 viktima dhe kanë detyruar autoritetet të shpallin disa zona si “rajone fatkeqësie”.
Reshjet e pandërprera që prej një jave kanë goditur dhjetë provinca, duke e kthyer qytetin Hat Yai në epiqendrën e krizës.
Sipas matjeve zyrtare, Hat Yai ka pësuar 335 mm shi në vetëm një ditë, niveli më i lartë i regjistruar në 300 vjet.
Pamjet nga qyteti tregojnë makina dhe shtëpi të fundosura nën ujë, ndërsa qindra banorë presin ndihmë mbi çatitë e tyre.
Rreth 2 milionë njerëz janë prekur nga përmbytjet në mbarë vendin, por vetëm 13 mijë prej tyre janë transferuar në strehimore. Shumica mbeten të bllokuar, të izoluar dhe pa furnizime.
Përballë krizës, ushtria tajlandeze ka marrë drejtimin e operacionit të shpëtimit dhe ka paralajmëruar dislokimin e një aeroplanmbajtëseje, 14 anijesh të ngarkuara me ndihma si dhe kuzhina fushore me kapacitet 3 000 vakte në ditë.
Ekipet mjekësore që ndodhen në bord janë të gatshme ta shndërrojnë aeroplanmbajtësen në një “spital lundrues” nëse situata përkeqësohet.
Përmbytjet nuk kanë kursyer as vendet fqinje. Vietnam ka raportuar të paktën 98 viktima vetëm brenda një jave, ndërsa Malajzia ka evakuuar më shumë se 19 000 persona dhe ka hapur 126 qendra emergjence.
Në shtetet Kelantan dhe Perlis, ekipet e shpëtimit udhëtojnë në ujë deri në gju për të nxjerrë banorët e bllokuar.
Me reshjet e shiut që vijojnë dhe me shumë zona të paarritshme, autoritetet paralajmërojnë se bilanci i dëmeve dhe viktimave mund të rëndohet edhe më tej në ditët e ardhshme.
