“ROMËT KËRCËNIM PËR SIGURINË”/ Sllovenia akuzohet për “zona sigurie” në lagjet rome! Miratohet ligji “Sutar”

Nga OraNews Përditësimi i fundit 19 Nëntor 2025, 15:40

Qeveria e Sllovenisë po përballet me akuza për diskriminim pasi miratoi ligjin “Sutar”, që i jep policisë të drejtën të hyjë në shtëpi dhe të survejojë zonat e shpallura “me rrezik sigurie”, të cilat kritikët thonë se synojnë lagjet rome. Aktivistët paralajmërojnë se masa trajton një komunitet të tërë si kërcënim publik, ndërsa sondazhet tregojnë mbi 60% mbështetje për ligjin.

Qeveria e Sllovenisë po kritikohet ashpër pas miratimit të një ligji të ri të sigurisë, i cili i jep policisë kompetenca të zgjeruara për të hyrë në shtëpi, përgjuar dhe survejuar zonat e shpallura “me rrezik të lartë”.

Aktivistë dhe organizata të të drejtave të njeriut thonë se masa synon në praktikë komunitetin rom, duke e trajtuar atë si kërcënim të sigurisë.

Ligji i njohur si “Sutar”, i emërtuar pas Ales sutar, i cili u vra muajin e kaluar në një konflikt me një të ri rom, u votua në mesnatë nga parlamenti slloven. Ngjarja e rëndë në qytetin Novo Mesto ndezi protesta masive, tensione etnike dhe çoi në dorëheqjen e dy ministrave.

Pas ngjarjes, kryeministri Robert Golob, i Lëvizjes së Qendrës së Majtë, premtoi masa të reja sigurie, duke thënë se ato nuk janë të drejtuara kundër një grupi të caktuar, por kundër kriminalitetit. Megjithatë kritikët thonë se ligji në praktikë “stigmatizon një minoritet të tërë”.

Edhe pse u zbut para votimit final, ligji mbetet shumë kontrovers. Ai i lejon policisë të hyjë në një pronë ose automjet pa urdhër gjykate, nëse zona është shpallur “me rrezik sigurie” dhe nëse konsiderohet se kjo është e domosdoshme për të sekuestruar armë.

Policia mund të përdorë gjithashtu mjete teknike të vëzhgimit – dronë, kamera, pajisje fotografimi dhe sistem identifikimi targash – nëse vlerësohet se jeta ose prona janë në rrezik. Kufijtë e këtyre zonave përcaktohen nga drejtori i përgjithshëm i policisë ose drejtori rajonal, bazuar në një “vlerësim sigurie”.

Një koalicion i majtë i partive opozitare bojkotoi seancën, duke e cilësuar ligjin “shtypës dhe diskriminues”. Por sondazhet tregojnë mbështetje të gjerë publike: sipas RTV Slovenia, mbi 60% e qytetarëve e mbështesin qasjen e qeverisë.

Ndërsa ligji hyn në fuqi, organizatat ndërkombëtare dhe përfaqësuesit e komunitetit rom paralajmërojnë se masat rrezikojnë të thellojnë ndarjet etnike në vend. Ndërkohë, Brukseli pritet të monitorojë nga afër nëse ligji përputhet me standardet e BE-së për të drejtat e njeriut.

Ligji vjen pak muaj para zgjedhjeve të përgjithshme të marsit, ku partia e kryeministrit Golob përballet me rritjen e forcave të djathta nacionaliste të ish-kryeministrit Janez Janša.