51 ndeshje si kuqezi, Amir Abrashi tërhiqet mes nderimeve: Ndeshjen me Serbinë nuk do ta harroj kurrë
Nga OraNews Përditësimi i fundit 16 Nëntor 2025, 19:18
Pas 51 ndeshjeve të luajtura me Kombëtaren Shqiptare të Futbollit, 35-vjeçari Amir Abrashi i ka dhënë lamtumirën ekipit. Ai u nderua nga FSHF para ndeshjes me Anglinë dhe u përshëndet nga tifozët.
“51 ndeshje si kuqezi, kilometra pafund të bëra, pjesë e historisë së Kombëtares, dy pjesëmarrje në Europian.
Amir Abrashi ka shkruar emrin e tij me gërma të arta në historinë e futbollit shqiptar dhe meriton vlerësimin maksimal nga çdo tifoz kuqezi”, njofton FSHF.
Abrashi ka qenë pjesë e Kombëtares në Euro 2016 në Francë dhe Euro 2024 në Gjermani.
Amir Abrashi, ish mesfushori i Kombëtares, analizoi sfidën me Anglinë dhe rrugëtimin e kuqezinjve në kualifikueset e Botërorir. Abrashi vlerësoi lojën e shfaqur deri më tani, ndërsa shtoi se ndaj Anglisë lojtarët duhet ta shijojnë, të luajnë pa presion!
“I kam ngjarë më shumë Lalës se ai është statik. Golin e vetëm e kam shënuar kundër Andorrës, me Ervin Bulkun si trajner kur u hoq Panuçi. Ndeshja që do mbaj mend gjithë jetën është ajo me Serbinë në Beograd.
Ajo ka qenë histori për gjithçka edhe që morëm 3 pikët në tavolinë. Ishte fantastike edhe ndeshja që fituam para 1 muaji në Serbi, pata shumë emocione para televizorit sepse këto ndeshje nuk janë normale, çunat kanë shumë presion dhe e kanë bërë në mënyrë fantastike së bashku me stafin.
Çunat janë shumë të mirë tani, janë të talentuar, nuk ka nevojë më për Abrashin në Kombëtare. Kjo ndeshja sot është për tu kënaqur, se Anglia ka shkuar direkt, ne në play off, duhet të luajmë qetë edhe mund të marrim barazim. Kualiteti tani është më i mirë, por të dyja grupet janë shumë të mira”, tha Abrashi për Klan.
