Shkëndija ndalet në Tetovë, Vardari triumfon pas tetë vitesh
Nga OraNews Përditësimi i fundit 27 Tetor 2025, 16:50
Në derbin më të madh të javës së 10-të në Ligën e Parë të Maqedonisë së Veriut, Shkëndija e Tetovës është mposhtur në shtëpi nga rivali historik, Vardari i Shkupit, me rezultatin minimal 0–1.
Kjo ishte humbja e parë e kuqezinjve pas një serie të gjatë ndeshjesh pa disfatë, ndërsa për mysafirët shënon një fitore historike pas plot tetë vitesh dhe 21 takimesh pa sukses ndaj Shkëndijës.
Ndeshja e zhvilluar në stadiumin e Tetovës nisi me ritëm të lartë dhe shumë duele në mesfushë, por me pak rrezikshmëri para portave. Shkëndija e dominoi lehtë posedimin dhe krijoi disa raste të mira, por pa arritur të konkretizonte.
Rasti më i pastër erdhi në minutën e 31-të, kur goditja e dënimit e Besart Ibraimit u prit nga portieri Taleski, ndërsa në vijim Spahiu dhe vetë Ibraimi nuk arritën ta dërgonin topin në rrjetë.
Pjesa e parë përfundoi pa gola, ndërsa në fillim të pjesës së dytë ndodhi momenti vendimtar i takimit.
Në minutën e 49-të, pas një goditjeje këndi për Vardarin, një mbrojtës i Shkëndijës preku topin me dorë brenda zonës dhe arbitri akordoi penallti. Nga pika e bardhë, David Babunski u tregua i saktë dhe shënoi golin e vetëm të ndeshjes.
Pas disavantazhit, kuqezinjtë u hodhën në sulm, duke ushtruar presion të vazhdueshëm mbi mbrojtjen e Vardarit, por portieri Taleski u tregua në formë të shkëlqyer, duke ndalur çdo tentativë.
Në minutën e 87-të, Shkëndija mendohej se kishte barazuar me një gol të bukur të Besart Ibraimit, por pas verifikimit të VAR-it, goli u anulua për pozicion jashtë loje.
Me këtë fitore, Vardari jo vetëm që i jep fund mallkimit tetëvjeçar ndaj rivalit tetovar, por ngjitet edhe në krye të tabelës me 24 pikë.
Nga ana tjetër, Shkëndija mbetet në vendin e katërt me 21 pikë dhe do të kërkojë të rikthehet te fitorja në sfidën e ardhshme ndaj Brerës në Strumicë.
Vardari, ndërkohë, do të presë në shtëpi Sileksin në javën e 11-të, në një tjetër përballje që pritet të jetë mjaft e zjarrtë.
