Turistja gjermane rrëzohet nga kompleksi në Barbullush, dërgohet në spitalin e Shkodrës
Nga OraNews Përditësimi i fundit 21 Tetor 2025, 11:00
Një turiste gjermane mbeti e plagosur dhe po trajtohet në spitalin e Shkodrës, ndërsa është rrëzuar nga ambientet e një kompleksi turistik në Barbullush të Vaut të Dejës, ku dhe po qëndronte, në rrethana ende të paqarta dhe dinamikë që po hetohet.
E moshuara ka qenë duke qëndruar në kompleks kur ka rënë nga lartësia dhe është dëmtuar. E plagosura është 76-vjeçarja me inicialet A.M., kurse policia tha sot (21 tetor) se nisi hetimet për zbardhjen e rastit.
Njoftimi:
“Specialistët për Hetimin e Krimeve të Komisariatit të Policisë Vau i Dejës referuan materialet në Prokurori, për vlerësim, pasi ditën e djeshme, është paraqitur në Spitalin Rajonal Shkodër, shtetasja gjermane A. M., 76 vjeçe, e cila dyshohet se është rrëzuar aksidentalisht në ambientet e një kompleksi turistik, në fshatin Barbullush. 76-vjeçarja është jashtë rrezikut për jetën”, bëri me dije policia vendore.
Pas veprimeve paraprake, në pritje edhe të dëshmisë së plotë të turistes, materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme.
