KALON STAFETËN NË FUSHËN E BLERTË! Ish-kapitenia e Anglisë për femra tërhiqet nga garat ndërkombëtare
Nga OraNews Përditësimi i fundit 14 Tetor 2025, 15:42
Ish-kapitenia e Anglisë për femra, Millie Bright, ka njoftuar tërheqjen nga futbolli ndërkombëtar pas nëntë vitesh me 88 paraqitje. Ajo tha se pas reflektimit dhe rikuperimit nga dëmtimi, ndjeu se kishte ardhur koha t’ia kalonte stafetën brezit të ri
Ish-kapitenia e kombëtares së Anglisë për femra, Millie Bright, ka njoftuar tërheqjen nga futbolli ndërkombëtar. 32-vjeçarja, mbrojtëse e Chelsea-t, e bëri të ditur vendimin të hënën.
Bright debutoi me Anglinë në vitin 2016 dhe gjatë karrierës së saj zhvilloi 88 ndeshje me fanellën kombëtare, duke shënuar gjashtë gola. Ajo ishte pjesë e ekipit që fitoi Kampionatin Evropian 2022 dhe më pas e udhëhoqi skuadrën si kapitenë në finalen e Kupës së Botës 2023, ku Anglia u mund nga Spanja.
“Nuk mund ta marrë askush tjetër këtë vendim për ty, dhe ndoshta tingëllon si një klishe, por është një ndjenjë,” tha Bright në podcast-in The Rest is Football.
“E kalova verën duke reflektuar, duke e qetësuar mendjen dhe duke shëruar gjurin. Kjo më ndihmoi ta shoh gjithçka në perspektivë, dhe jam jashtëzakonisht krenare dhe e nderuar që kam luajtur për Anglinë për kaq gjatë.”
“Shumë njerëz ndoshta pyesin pse, por është një vendim personal, një vendim që e kam marrë vetë. Thjesht e ndjen kur ka ardhur koha për t’ia kaluar stafetën të tjerëve,” shtoi ajo.
Bright kishte vendosur të mos ishte pjesë e skuadrës së Anglisë për Kampionatin Evropian të këtij viti, duke theksuar se nuk mund të jepte 100% as mendërisht, as fizikisht. Kombëtarja angleze më pas e mbrojti me sukses titullin.
