Maignan drejt lamtumirës me Milanin! Negociatat për rinovim kanë dështuar për momentin. Chelsea, Bayern dhe Juventus ndjekin portierin francez
Nga OraNews Përditësimi i fundit 10 Tetor 2025, 14:32
E ardhmja e Mike Maignan te Milani është në pikëpyetje. Bisedimet për rinovimin e kontratës janë ndërprerë dhe portieri francez, i njohur për pritjet spektakolare dhe karakterin udhëheqës, mund të largohet në verën e ardhshme si lojtar i lirë. Chelsea, Bayern Munich dhe Juventus kanë vënë sytë mbi të.
Në horizont nuk ka asnjë rinovim. Të paktën për momentin. E ardhmja e Mike Maignan duket larg Milanit pas prishjes së negociatave për kontratën e re. Me marrëveshjen aktuale që skadon në qershor të ardhshëm, portieri francez është tashmë një nga emrat më të kërkuar në tregun europian.
Interesimi për të është i madh: Chelsea kishte bërë hapa konkretë më herët, ndërsa Bayern Munich është gati të hyjë në garë. Në Itali, Juventusi e ndjek me vëmendje situatën, duke parë mundësinë për të forcuar një repart ku lidershipi dhe siguria janë gjithnjë të kërkuara.
Pritja spektakolare ndaj Gatti në “Allianz Stadium” që ruajti barazimin 0-0, vetëm sa e ka forcuar reputacionin e tij si një portier “magjik” – siç e quajnë tifozët. Pavarësisht një sezoni jo të shkëlqyer vitin e kaluar, Maignan është rikthyer në formën e tij më të mirë, duke kujtuar kohën kur zuri vendin e Donnarumma-s pa bërë që dikush ta ndjente mungesën e tij.
Me një pagë prej 2.8 milionë eurosh në vit, francezi ka një kontratë që mund të përmirësohet ndjeshëm nga çdo klub i madh pa arritur shifra të frikshme.
Për këtë arsye, muajt e ardhshëm pritet të jenë vendimtarë: agjentët e tij do të zhvillojnë bisedime intensive me klubet e interesuara, ndërsa Milani rrezikon të humbasë një nga shtyllat e skuadrës.
Juventusi, edhe pse ka besim te Di Gregorio, e sheh Maignan si liderin që mund t’i japë forcë dhe personalitet ekipit. Në fund, gjithçka do të varet nga një gjë: a do të mund ta bindë “magjikun”, Milani, të qëndrojë edhe për një cikël tjetër?
