U rekrutuan nëpërmjet Telegramit, dy 17-vjeçarë arrestohen në Holandë për spiunazh për Moskën
Nga OraNews Përditësimi i fundit 26 Shtator 2025, 10:09
Policia holandeze ka arrestuar dy adoleshentë 17-vjeçarë nën dyshimin për përfshirje në veprimtari spiunazhi në favor të Rusisë. Lajmi është bërë i ditur të premten nga gazeta holandeze “De Telegraaf”.
Sipas raportimeve, njëri prej të miturve u rekrutua përmes aplikacionit Telegram nga një haker pro-rus. Babai i tij konfirmoi për median se djali ishte kontaktuar dhe më pas përfshirë në një rrjet të dyshuar spiunazhi.
Në muajin gusht të këtij viti, i riu dyshohet se ka anashkaluar zonën përreth zyrave të Europolit, Eurojustit dhe Ambasadës Kanadeze në Hagë, duke mbajtur me vete një pajisje të njohur si “sniffer WiFi” — një mjet që shërben për të gjurmuar rrjete WiFi dhe për të përgjuar të dhëna të ndjeshme.
Autoritetet holandeze nuk kanë konfirmuar ende nëse informacione të ndjeshme janë komprometuar, por hetimet janë në vazhdim dhe pritet që rasti të marrë vëmendje të veçantë për shkak të përfshirjes së mundshme të një fuqie të huaj në rekrutimin e të miturve për qëllime spiunazhi.
