Në shtigjet e “zanave e kreshnikëve”/ Udhëtim mes bjeshkëve, natyrës së gjallë dhe traditës shekullore
Nga OraNews Përditësimi i fundit 30 Gusht 2025, 11:52
Këtë pamje e këtë përjetim në verë mund ta shijoni vetëm në Bjeshkët e Sjapicës në Tropojë!
Male të larta, rudina të mbushura me lule, ujëra të ftohta e ajër i kristaltë.
Shtrihen në 2000 metra mbi nivelin e detit, në kufi me Plavën e Gucinë.
Jeta është e thjeshtë, por e gjallë.
Shpërthen si vetë natyra: ahet, pisha, bredha e livadhet me lule shumëngjyrëshe.
Strehë gjen në stane me gurë e dru!
Banorët që verojnë atje mbajnë bagëti, mbledhin bimë medicinale dhe kujdesen për kullotat.
Vitet e fundit, Sjapica është shndërruar në një destinacion të preferuar turistik.
Vizitorët gjejnë këtu ushqim bio, ujë të pastër burimi dhe mikpritjen tipike shqiptare.
“Jam nga Rumania. Vend i mrekullueshëm. Peisazh shume i bukur. Liqeni, majat e maleve. Ushqimi i jashtëzakonshëm. Njerëzit mikpritës.”
Banorët u ofrojnë strehim në stanet e tyre, tregojnë zakone shekullore dhe u japin mundësinë të bëhen pjesë e jetës së përditshme në bjeshkë.
Turizmi ka sjellë burime të reja ekonomike, duke ruajtur njëkohësisht traditën.
Ky stan në kryqëzimin e shtigjeve, është shndërruar në një bazë për të dashuruarit me bukuritë e natyrës shqiptare.
Udhëtarët mund të karikoni aty pajisjet falë energjisë nga panele diellore e mund të shijojnë ushqim e pije.
Në majë të bjeshkës kanë hapur edhe një dyqan për bjeshkatarët e turistët
Por këto bukuri janë të kërcënuara.
Pyllëzimi i shpejtë natyror po zhduk kullotat tradicionale dhe bimët medicinale.
Banorët paralajmërojnë se, me këtë ritëm, brenda 20 vitesh do të zhduken rudinat.
Ata kërkojnë ndërhyrjen e shtetit, që të ruhet ekuilibri mes natyrës dhe jetës së banorëve.
Turistët që përjetojnë magjinë e bjeshkëve shqiptare urojnë që këto pamje të mos ndryshojnë!
Për shekuj këtu janë kënduar këngë kreshnike me lahutën e lashtë e fyellin e bariut duke përcjellë histori trimërie dhe krenarie shqiptare.
