Rama përmend një tjetër gjyqtar për hapsirat publike: Nuk është presion, po mbroj interesin publik
Nga OraNews Përditësimi i fundit 28 Gusht 2025, 13:12
Kryeministri Edi Rama ka reaguar në rrjetet sociale ne lidhje me rastin e tjetërsimit të një hapësire publike në Tiranë, ku sipas tij një biznes ka zaptuar një zonë mes dy pallateve, ndërsa autoritetet nuk mund ta prishin ndërtimin për shkak të vendimit të gjykatës.
Në postimin e tij, Rama sulmoi drejtpërdrejt gjyqtarin, i cili vendosi të mos hapë kalimin e mbyllur nga ndërtesa pa leje, duke e cilësuar këtë vendim si të paligjshëm dhe në dëm të komunitetit.
Kryeministri theksoi se objekti pa leje mund të rrezikojë sigurinë e qytetarëve dhe të pengojë veprimet e zjarrfikësve në rast emergjence.
Rama njoftoi gjithashtu se Ministria e Drejtësisë do t’i përcjellë rastin organeve të kontrollit të gjyqësorit, duke bërë thirrje që qytetarët e prekur të bashkohen me ankimimet. Ai theksoi se veprimet e tij kanë për qëllim mbrojtjen e interesit publik dhe nuk duhet të interpretohen si presion mbi gjyqësorin.
“Gjykatësi Ligoraq vendosi në pak minuta pa praninë e palëve, që të mos hapet kalimi i mbyllur nga kjo ngrehinë pa leje me kupolë xhami mes dy pallateve, nën të cilën shtrihet një dyqan ku bëhet tregti në kurriz të komunitetit.
Gjykatësi Ligoraq nuk e ka parë të udhës që të mbajë anën e komunitetit të zënë në kurth nga ky ndërtim pa leje dhe me siguri as nuk e ka menduar që mos o Zot, në rast zjarri ky dyqan kthehet në barrikadë vrastare, e pakapërcyeshme edhe për banorët edhe për zjarrfikësit.
Gjykatësi Ligoraq i bashkohet kësisoj prokurores Gjeli, gjykatësve Balliu e Demiri, në dosjen që Ministria e Drejtësisë do t’i përcjellë organeve të kontrollit e të vetëqeverisjes së gjyqësorit, ndërkohë që ne do të kërkojmë që ankimimeve në këto organe t’u bashkohen edhe qytetarët e dëmtuar nga këto masa sigurie absurde, në dëm të komunitetit, mjedisit dhe rendit ligjor.
Post Scriptum. Atyre që komentojnë apo bëjnë deklarata publike për gjasme presion nga ana ime mbi gjyqësorin, u them se për të mbrojtur interesin publik, të drejtën e komunitetit dhe të drejtat e liritë e njerëzve nga shpërdoruesit e detyrës në radhët e gjyqësorit, ne as do të heshtim më, as do të ndalemi së adresuari rastet e shpërdorimit në organet përkatëse të cilat Kushtetuta e ligji i ngarkojnë edhe me mbrojtjen e interesave të popullit e të shtetit, nga prokurorë e gjykatës të paaftë, të papërgjegjshëm, të dyja bashkë apo edhe më keq, pa atdhe fare.
Por askush të mos ngatërrojë qëndrimin ndaj këtyre individëve, me qëndrimin tonë të palëkundur në mbështetje të drejtësisë dhe institucioneve të saj, në luftën kundër korrupsionit, krimit të organizuar dhe lirive e të drejtave të njerëzve”, shkruan Rama.
