EMRAT/ Arrestohen 2 persona për zjarrëvënie në Divjakë dhe Mallakastër
Nga OraNews Përditësimi i fundit 3 Gusht 2025, 10:02
Policia e Shtetit njofton se janë vënë në pranga dy shtetas të dyshuar si autorë të zjarrvënieve në Divjakë e Mallakastër.
Në Divjakë u arrestua për zjarrvënie shtetasi Koçi Allkanjari 65 vjeç, banues në fshatin Korije, pasi ka ndezur zjarr për djegien e mbeturinave në tokën e marrë me qira dhe si pasojë e përhapjes së flakëve janë djegur 170 rrënjë ulliri në pronësi të një shtetasi.
Ndërsa në Mallakastër u arrestua për zjarrvënie shtetasi Pëllumb Jançaj, 41 vjeç, banues në fshatin Belishovë, pasi ka ndezur zjarr për djegien e ferrave në tokën e tij dhe si pasojë e përhapjes së flakëve është djegur një sipërfaqe me shkurre.
Si rezultat i veprimeve hetimore për dokumentimin e rasteve të zjarrvënieve dhe nxjerrjen përpara përgjegjësisë ligjore të autorëve, specialistët për Hetimin e Krimeve të Komisariateve të Policisë Divjakë dhe Mallakastër arrestuan në flagrancë autorët përkatës.
Materialet procedurale iu referuan Prokurorisë pranë Gjykatës së Shkallës së Parë e Juridiksionit të Përgjithshëm Fier, për veprime të mëtejshme.
Drejtoria Vendore e Policisë Fier apelon për të gjithë qytetarët, që në asnjë rast të mos ndezin zjarre, pasi do të përballen me ligjin.
