Propaganda e VV-së për operacionin e FSK-së në veri, ambasadori francez: Manipulimi i informacionit po bëhet sistematik

Nga OraNews Përditësimi i fundit 30 Korrik 2025, 08:57

Ambasadori i Francës në Kosovë, Olivier Guerot, ka dalë më një reagim lidhur me operacionin e kërkimit, ku u përfshi edhe FSK’ja, në Liqenin e Ujmanit për trupin e mërgimtarit 33-vjeçar, që dyshohet se ka kërcyer nga ura e liqenit dy ditë më parë.

Guerot ka shprehur mbështetjen e tij për KFOR’in, teksa tha se do të vazhdojë t’i ofrojë mbështetjen e nevojshme “në një kontekst ku dezinformimi dhe manipulimi i informacionit po bëhen sistematike”, duke aluduar për publikimin e fotografisë nga VV ku shiheshin automjetet e FSK’së duke shkuar në Veri pa KFOR’in.

“Franca mbështet plotësisht KFOR-in dhe Komandantin e tij. Që nga krijimi i tij, KFOR-i ka luajtur dhe vazhdon të luajë një rol të pazëvendësueshëm në sigurimin e sigurisë për të gjithë. Ai meriton respektin dhe mirënjohjen e të gjithë aktorëve në rajon. Franca do të vazhdojë t’i ofrojë misionit gjithë mbështetjen e nevojshme në një kontekst ku dezinformimi dhe manipulimi i informacionit po bëhen sistematike”, ka shkruar Guerot.

Me reagim për këtë çështje doli edhe Ambasada e Gjermanisë në Kosovë, e cila shprehu shqetësim, për siç tha, përpjekjet për politizim, duke theksuar se shkuarja e ekipit të FSK’së atje, u aprovua nga Komandanti i KFOR’it ekskluzivisht për qëllime humanitare.

Sipas Ambasadës, deklaratat që e paraqitën këtë mision si “operacioni i parë i FSK’së në veriun e Kosovës”, e keqinterpretojnë qëllimin dhe frymën e këtij angazhimi.

“Po aq shqetësuese janë edhe akuzat për manipulim me fotografi – konkretisht, heqja e elementëve të dukshëm të shoqërimit të KFOR-it – për të promovuar narrativë të rrejshme. Veprime të tilla rrezikojnë të minojnë besimin e publikut dhe të heqin vëmendjen nga fokusi humanitar i misionit”, thuhet në reagim.

Ambasada ka thënë se vdekja e 33-vjeçarit duhet të jetë një moment zie kolektive, dhe jo një rast për përfitime politike

Ndaj këtij deklarimi, reagoi zëdhënësi i VV’së, Arlind Manxhuka.

Manxhuka ka thënë se në postimin e nxjerrë nga VV me një fotografi nuk ka asnjë manipulim.

“Në fotografitë dhe linqet më poshtë mund ta shihni qartazi që nuk ka asnjë manipulim dhe fotografitë janë të vërteta e lehtësisht të vërtetueshme. Është shumë me rëndësi që në epokën e lajmeve të rreme reagimet të jenë të bazuara në fakte dhe të vërtetën dhe jo të shtresëzohen mbi lajme të rreme. Në të vërtetë vet lajmi për manipulimin e fotografisë nga ana e VV-së është fake neës çka duhet se ju ka vendosur në lajthitje edhe vet juve”, ka shkruar Manxhuka.