KRYEMINISTRI I RMV PUSTEC! Mickovski premton mbështetje për maqedonasit që jetojnë në Shqipëri
Nga OraNews Përditësimi i fundit 28 Korrik 2025, 14:46
Kryeministri i Maqedonisë së Veriut, Christian Mickovski, mori pjesë në festivalin folklorik të komunitetit maqedonas në Pustec, ku u prit me ngrohtësi nga banorët dhe autoritetet vendore.
Vizita e tij u cilësua si një sinjal i qartë për një fazë të re të afrimit mes Shkupit zyrtar dhe bashkëkombësve jashtë kufijve shtetërorë, veçanërisht në Shqipëri.
Në këtë takim kulturor e simbolik, Mickovski vlerësoi qëndrueshmërinë dhe ruajtjen e identitetit nga ana e komunitetit maqedonas në Pustec, duke theksuar se maqedonasit në Shqipëri kanë ruajtur me dinjitet gjuhën dhe zakonet e tyre, pavarësisht sfidave të shumta dhe mungesës së vëmendjes ndër vite.
Më tej gjatë fjalës së tij, ai nënvizoi se qeveria e Maqedonisë së Veriut, synon të ndërtojë një marrëdhënie të re me bashkëkombësit në diasporë, e cila do të bazohet në mbështetje të qëndrueshme në fusha si arsimi, kultura, zhvillimi ekonomik dhe bashkëpunimi ndërkufitar.
Ai e përshkroi këtë angazhim jo si akt simbolik, por si pjesë e një vizioni të ri për shtet-ndërtimin dhe përfshirjen e çdo qytetari maqedonas, pavarësisht vendndodhjes.
Mickovski shprehu vullnetin për ta kthyer këtë vizitë në fillimin e një bashkëpunimi të qëndrueshëm dhe afatgjatë, duke e konsideruar Pustecin jo vetëm një zonë me vlera etnografike, por edhe një urë të rëndësishme lidhëse për dialog dhe zhvillim.
Ai premtoi që mbështetja për këtë komunitet do të konkretizohet përmes projekteve të prekshme dhe politikave të qëndrueshme.
