Siria i kërkon Turqisë mbështetje për të forcuar mbrojtjen pas përleshjeve sektare
Nga OraNews Përditësimi i fundit 23 Korrik 2025, 19:50
Qeveria e përkohshme e Sirisë ka kërkuar mbështetjen e Turqisë për të forcuar aftësitë e saj mbrojtëse, thanë sot zyrtarët turq, pas dhunës sektare gjatë dy javëve të fundit që rriti tensionet në Siri dhe nxiti ndërhyrjen izraelite, sipas AP.
“Siria gjithashtu ka kërkuar ndihmë për të luftuar “organizatat terroriste”, përfshirë grupin e Shtetit Islamik”, thanë zyrtarët e mbrojtjes, të cilët folën në kushte anonimiteti pasi nuk ishin të autorizuar për të diskutuar publikisht çështjen.
“Turqia, e cila ka shprehur prej kohësh gatishmërinë për të ndihmuar Sirinë, po punon për të ofruar trajnime, shërbime këshillimore dhe mbështetje teknike për të ndihmuar në forcimin e kapacitetit mbrojtës të Sirisë”, shtuan zyrtarët.
“Për sa kohë që vendi ynë vëllazëror, Siria, kërkon ndihmë, Turqia do të vazhdojë të qëndrojë fort në krah të saj”, u tha gazetarëve Omer Celik, zëdhënës i partisë në pushtet të presidentit turk, Recep Tayyip Erdogan, kur u pyet lidhur me kërkesën e Sirisë.
“Forcat heroike të armatosura turke do ta përmbushin kërkesën, si për të ndihmuar vëllezërit tanë sirianë ashtu edhe për të parandaluar paqëndrueshmërinë atje, e cila është jetike për sigurinë kombëtare të Turqisë”, tha ai.
Tensionet u përshkallëzuan në Sirinë jugore javën e kaluar kur shpërthyen përleshje të dhunshme midis fiseve arabe beduine dhe milicive të pakicës druze, në provincën Sweida.
Konflikti shkaktoi sulme ajrore izraelite mbi konvojet e forcave qeveritare në Sweida dhe mbi selinë e Ministrisë së Mbrojtjes në Damaskun qendror, të cilat Izraeli i justifikoi për të mbrojtur komunitetet druze.
