Erald Maksuti i bashkohet Flamurtarit, një kapitull i ri në elitën e futbollit shqiptar
Nga OraNews Përditësimi i fundit 21 Korrik 2025, 16:19
Flamurtari vazhdon të jetë ndër skuadrat më aktive në merkaton e verës, duke shtuar një tjetër emër premtues në radhët e saj.
Sulmuesi i majtë i Kombëtares U-21, Erald Maksuti, është zyrtarisht pjesë e klubit vlonjat, pas një periudhe trevjeçare me Apoloninë e Fierit.
Lajmi u bë i ditur nga vetë Flamurtari nëpërmjet një postimi në rrjetet sociale, ku klubi e prezantoi futbollistin e ri me entuziazëm, duke i uruar mirëseardhjen në “familjen kuqezi”.
I lindur më 10 maj 2004, Maksuti vlerësohet si një nga talentet më premtues të brezit të ri dhe pritet të japë kontribut të rëndësishëm te Flamurtari në Kategorinë Superiore.
Ky transferim përfaqëson një hap të madh për vetë lojtarin, i cili tani ka mundësinë të tregojë vlerat e tij në një nga skenat më të rëndësishme të futbollit shqiptar.
Ndërkohë, për Flamurtarin, afrimi i Maksutit është sinjal i qartë për ambicie të larta në sezonin e ardhshëm.
Me këtë lëvizje, Flamurtari konfirmon se nuk po kursen asnjë përpjekje për të ndërtuar një skuadër konkurruese dhe për t’u rikthyer aty ku i takon: në majat e futbollit shqiptar.
