E paprecedentë në Champions League, del të luajë me numrin e shkruar me stilolaps...

Nga OraNews Përditësimi i fundit 9 Korrik 2025, 16:20

UELLS - New Saints mund të mburren se janë skuadra e parë dhe e vetme uellsiane që ka arritur në fazën e grupeve të çdo kompeticioni evropian.

Ata e arritën këtë sukses sezonin e kaluar në Konferencë.

Tani ata kanë bërë histori përsëri, në mënyrën e tyre.

Në ndeshjen e parë të raundit të parë kualifikues kundër KF Shkendija (0-0), 'TNS' arriti diçka të paprecedentë në historinë e Champions League.

Ndeshja ishte gati të shkonte në pushim kur Rory Holden, i cili shënoi një gol në fitoren e Konferencës kundër Astanës, pa fanelën e tij të mbuluar me gjak.

Gjyqtari Rob Hennessy e detyroi irlandezin e Veriut të largohej nga fusha dhe të ndërronte fanellën.

Në pamundësi për të gjetur menjëherë një fanelë me numrin e tij, lojtarët e New Saints vendosën të merrnin një masë emergjente në mënyrë që ai të mund të kthehej në fushë dhe të luante me 10 lojtarë sa më pak kohë të ishte e mundur: të shkruanin numrin ‘18’ të Holden me një stilolaps BIC.

Për fat të mirë, rrëmuja e vogël nuk zgjati shumë. Erdhi pushimi, ata ishin në kohë shtesë në pjesën e parë, dhe ai u rishfaq në pjesën e dytë, me numrin dhe emrin e tij  tashmë të fiksuar fort në gjoks.