Sulmi amerikan në Iran/ Rama: Regjimi teokratik në Teheran nuk duhet të zotërojë armë bërthamore, jemi me Trumpin!
Nga OraNews Përditësimi i fundit 22 Qershor 2025, 18:38
Kryeministri Edi Rama ka reaguar në X (ish-Twitter) për sulmin e SHBA ndaj tre objekteve bërthamore të Iranit. Rama shprehet se regjimi teokratik në Iran prej 70 vitesh bën propagandë kundër vendeve perëndimore dhe madje ka bërë thirrje të hapur për shkatërrimin e tyre.
Sipas tij një shtet i tillë nuk duhet lejuar të ketë armë bërthamore. Shqipëria, shton Rama, është përkrah përpjekjeve të presidenti të SHBA-së Donald Trump për të mos lejuar Teheranin të zotërojë armë bërthamore.
Rama: Kjo nuk është thjesht një tjetër shtet me armë bërthamore. As një diktaturë me ambicie bërthamore. Kjo është një teokraci — e armatosur me retorikë apokaliptike, e zhytur në shtatëdhjetë vite propagandë që i përshkruan vendet e lira si “satanike” dhe që bën thirrje hapur për shkatërrimin e tyre. Sipas çdo standardi, ky është një përjashtim i rrezikshëm — i papërngjashëm me çdo shtet tjetër që zotëron armë bërthamore, pa marrë parasysh sistemin e tij politik.
Si një komb që ka dalë nga errësira e një regjimi ateist dhe brutal, si një anëtar krenar i botës së lirë dhe si një partner strategjik i Shteteve të Bashkuara të Amerikës, Shqipëria qëndron fuqishëm përkrah përpjekjeve të sinqerta të Presidentit Trump për të parandaluar që regjimi teokratik në Teheran të zotërojë ndonjëherë armë bërthamore.
