Disa të vdekur pas stuhisë në Misuri dhe mijëra familje pa energji elektrike
Nga OraNews Përditësimi i fundit 17 Maj 2025, 15:05
Një stuhi e fortë në shtetin amerikan të Misurit ka shkaktuar disa viktima, raportuan mediet amerikane.
”Të paktën katër vdekje janë konfirmuar në qytetin e St Louis, i cili ka një popullsi prej rreth 280 000 banorësh”, raportuan mediet duke përfshirë ”New York Times” dhe CNN.
Të paktën 10 persona u plagosën, njëri rëndë. Stuhia përfshiu zonën të premten pasdite, duke shkaktuar dëme të mëdha. Stuhitë goditën pjesë të Wisconsinit, Michiganit dhe Illinoisit një ditë më parë.
Shërbimi Kombëtar i Motit vazhdon të paralajmërojë për kushte ekstreme të motit në disa shtete në Midwest dhe në lindje të Shteteve të Bashkuara.
Sipas faqes së internetit poweroutage.us, më shumë se 100 000 familje në Misuri ishin pa energji të premten në mbrëmje. Qindra mijëra klientë në disa shtete të tjera ishin gjithashtu pa energji.
Ekspertët ia atribuojnë rritjen e fatkeqësive natyrore në SHBA – të tilla si stuhitë, përmbytjet dhe zjarret në pyje – ndikimeve të ndryshimeve klimatike.
